„ფიტნესკლუბი ერთ-ერთი ყველაზე საშიშია ინფექციის გავრცელების თვალსაზრისით“, – წერს „ფეისბუქის“ საკუთარ გვერდზე საფრანგეთში მოღვაწე ქართველი ექიმი ქეთი ლობჟანიძე.
ის ამ პოსტით პარტია „გირჩის“ ლიდერის განცხადებებს ეხმაურება. შეგახსენებთ, რომ ზურაბ ჯაფარიძემ სოლიდარობა გამოუცხადა ბათუმში მდებარე ერთ-ერთ ფიტნესკლუბს. ჯაფარიძე კლუბის ხელმძღვანელობასთან ერთად აპროტესტებს ფიტნესკლუბის მუშაობის შეჩერებას, რომელიც მთავრობის მიერ დაწესებულმა შეზღუდვებმა გამოიწვია.
„ადამიანები აქ ვარჯიშობენ, იჯანსაღებენ ორგანიზმს. სწორედ ამიტომ, მე მთელს დარბაზს ვქირაობ ჩემს საცხოვრებელ სახლად. ფიტნესკლუბის დირექტორი ფართთან ერთად აქირავებს სავარჯიშო ინვენტარსაც. ნებისმიერ ადამიანს შეუძლია აქ, ჩემთან სტუმრად მოსვლა, ვისაც ვარჯიში უნდა“, – ამბობს ჯაფარიძე.
ამ განცხადებას პარიზში მყოფი ქართველი ექიმი ასე ეხმაურება:
„ფიტნესკლუბი ერთ-ერთი ყველაზე საშიშია ინფექციის გავრცელების თვალსაზრისით. დახურული სივრცეა და იქ ნიღბების გაკეთება შეუძლებელია! ესაა მზაკვრული მავნებლობა, რომელიც უბრალოდ აზრადაც არ უნდა მოგივიდეს, თუ ოდნავ მაინც გაგაჩნია ემპათია!
კლუბის მეპატრონის ფინანსურ ზარალზე დარდობენ და საავადმყოფოების გადატვირთვის გამო სუნთქვის უკმარისობის მქონე ხალხი რომ ბინაზე რჩება და განწირულია, ამას არაუშავს! სისტემა ისედაც კოლაფსშია და ესენი ხელს უწყობენ ახალ-ახალი კლასტერების შექმნას“, – წერს ქეთი ლობჯანიძე სოციალურ ქსელში.
კომენტარები