“ბატონ ავთანდილს თანამშრომლები გულში იკრავდნენ” – ავთანდილ თალაკვაძე თანამდებობიდან გადადგა

ჯანდაცვის სამინიტროს საგანგებო სიტუაციების კოორდინაციისა და გადაუდებელი ცენტრის ხელმძღვანლი, ავთანდილ თალაკვაძე თანამდებობიდან გადადგა.

უწყების პრესამსახური ინფორმაციას ადასტურებს. არსებული ინფორმაციით, თალაკვაძემ პოსტი პირადი განცხადების საფუძველზე დატოვა.

ავთანდილ თალაკვაძემ ცენტრის დირექტორის პოზიციის დატოვებასთან დაკავშირებით განცხადება პირადი გადაწყვეტილების საფუძველზე დაწერა.

“მინდა, ამ ადამიანის განსაკუთრებულობაზე ორი სიტყვით გითხრათ და ყოველგვარი გადაჭარბების გარეშე ვთქვა, რომ საუკეთესო საჯარო მოხელეა, ვისაც ოდესმე შევხვედრივარ.

ყველასთვის ცნობილია, რომ ავთანდილ თალაკვაძე უწყებაში ერთ-ერთი ყველაზე წარმატებული ხელმძღვანელი გახლდათ, რომელმაც არაფრისგან ააშენა სასწრაფო დახმარება და დღეს უკვე ქვეყანაში ერთ-ერთი ყველაზე ძლიერი სამსახური – საგანგებო სიტუაციების კოორდინაციისა და გადაუდებელი დახმარების ცენტრი შექმნა.

ყოველთვის ვფიქრობდი, რომ არანორმალური სამუშაო რეჟიმით ცხოვრობდა – 24 საათიანი, მრავალი უძილო ღამით. 3 წელი მომიწია მასთან მუშაობა და ვერასოდეს დავითვლი, რამდენი ადამიანის სიცოცხლის გადარჩენაა პირადად მისი დამსახურება.

მის პიროვნულ თვისებებზე აღარაფერს ვიტყვი.

სასწრაფოს მედპერსონალის ახალ შენობებს რომ ვხსნიდით, მთელი საქართველოს მასშტაბით, ყველგან, ბატონ ავთანდილს თანამშრომლები გულში იკრავდნენ. მართლა გეუბნებით, ასე უყვარდათ თავისი დირექტორი, რაც ჩვენს რეალობაში, დამეთანხმებით, რომ უჩვეულოა.

უდიდეს პატივს ვცემ, ძალიან მიყვარს და წარმატებას ვუსურვებ.

ავთანდილ თალაკვაძე / Avtandil Talakvadze მადლობა ადამიანობისთვის! – წერს ფეისბუქის გვერდზე უწყების პიარის სამსახურის უფროსი თაკო სარიშვილი.