თბილისის მეტრო მუშაობას აჩერებს – ბელორუსიდან მემანქანეებს აღარ ჩამოვიყვანთ?

კორონავირუსის გავრცელების პრევენციის მიზნით დაწესებული ახალი რეგულაციების თანახმად, 28 ნოემბრიდან 23 დეკემბრის ჩათვლით პერიოდში თბილისის მეტრო არ იმუშავებს.

საკოორდინაციო საბჭოს გადაწყვეტილებით, ეპიდვითარების სტაბილიზაციის მიზნით მთავრობა შემდეგ ზომებს მიმართავს:

28 ნოემბრიდან 23 დეკემბრის ჩათვლით პერიოდში მსხვილ ქალაქებში, კერძოდ კი თბილისში, ქუთაისში, ბათუმში, რუსთავში, ზუგდიდში მუნიციპალური ტრანსპორტი, მათ შორის თბილისის მეტრო არ იმუშავებს.

ამასთანავე, 24 დეკემბრიდან 2 იანვრის ჩათვლით პერიოდში დაიწყება შეზღუდვების შემსუბუქება და მუნიციპალური ტრანსპორტი იმუშავებს მგზავრთა რაოდენობის შეზღუდვით.

3 იანვარი-15 იანვრის პერიოდში აღდგება ყველა ის შეზღუდვა, რომელიც მოქმედებდა 28 ნოემბრიდან 24 დეკემბრამდე პერიოდში.

16 იანვრიდან 31 იანვრის ჩათვლით პერიოდში მუნიციპალური ტრანსპორტი მხოლოდ შაბათ-კვირას არ იმუშავებს.

“ალია” შეგახსენებთ, გუშინ ქალაქის მერმა, კახა კალაძემ, განაცხადა, რომ მეტრო არ დაიკეტება და ბელორუსთან შეთანხმება აქვს დადებული, იქედან ჩამოიყვანს მემანქანეებს და მეტრო მაინც არ დაიკეტება! როგორც ჩანს, კალაძემ ან არ იცოდა ახალი შეზღუდვების შესახებ, ან იცოდა და იმიტომ იყო ასე დარწმუნებული, რომ მემანქანეებსაც კი ჩამოიყვანდა, რომ დასჭირვებოდა… (?) მაინც ჩამოგვეყვანა მემანქანეები, ბატონო კახა, იმას მაინც მოგვიყვებოდნენ, ამდენათასიანი მიტინგების ფონზე, როგორ გადარჩნენ!