როგორ განმარტავს ცესკო შემაჯამებელ ოქმებში უზუსტობებს

შემაჯამებელ ოქმებთან დაკავშირებულ უზუსტობებზე ცენტრალურ საარჩევნო კომისიაში (ცესკო) აცხადებენ, რომ ამაში კომიკურია არაფერია და არსებულ შეცდომებს შემდეგნაირად ხსნიან. უწყების პრესსპიკერის, ნათია იოსელიანის თქმით, საარჩევნო ოლქი #3, (საარჩევნო უბნის ნომერი: 03.03.75.) შემაჯამებელ ოქმს თან ახლავს შესწორების ოქმი და რომ ამ შესწორების ოქმში დაკორექტირებულია ციფრი.

“ორივე კანდიდატს აქვს 266 ხმა, მათ შორის ბათილი ბიულეტინები 11-ია და ამათი ჯამი, ბუნებრივია, ვერ იქნება 75 ვერანაირად. თუმცა, თუ გადავხედავთ შესწორების ოქმს, ერთ-ერთ კანდიდატს ნაცვლად 266 ხმისა, უნდა ჰქონდეს 38 ხმა. ამ შემთხვევაში საოლქო საარჩევნო კომისიის თავმჯდომარე და მდივანი ადგენენ შესწორების ოქმს”, — აცხადებს იოსელიანი.

რაც შეეხება #21 საარჩევნო უბნის 21.51.53 მეორე შემაჯამებელ ოქმს, ცესკოს პრესსპიკერის განმარტებით, ამ შემთხვევაშიც ამ შემაჯამებელ ოქმს ახლავს შესწორების ოქმი და ამ შესწორების ოქმში 2 მონაცემია დაზუსტებული. მისივე თქმით, პირველი, ეს გახლავთ ბათილი ბიულეტინების რაოდენობა, რომელიც შემაჯამებელ ოქმში გამორჩენილია და ეს რაოდენობა გახლავთ 12. იოსელიანი ამბობს, რომ ეს ცვლილება შესწორების ოქმში შესულია.

“კიდევ ერთ-ერთ კანდიდატს აქვს 262 ხმა, თუმცა შემაჯამებელ ოქმში არის დაკორექტირებული ციფრი, ორიანია გადაკეთებული. ამ შემთხვევაში, კანონის მოთხოვნის დაცვით, შედგენილია შესწორების ოქმი და ორივე მონაცემი, როგორც გამორჩენილი ბათილი ბიულეტინების რაოდენობა 12, ისე ერთ-ერთი კანდიდატის მიერ მიღებული ხმების ჯამი 262, რომელიც გადაკეთებულია შემაჯამებელ ოქმში არის დაკორექტირებული. შესწორების ოქმში წერია, რომ ნაცვლად 262-სა, სადაც რიცხვი 2 არის გადაკეთებული, უნდა ეწეროს 262. ამიტომ ამაში კომიკური არაფერი არის. ეს არის კანონის მოთხოვნა, შესაბამისად, ორივე მაჟორიტარული ოლქის შემაჯამებელი ოლქის შემთხვევაში აბსოლუტურად სწორად არის შედგენილი.

ცესკოში, ასევე, განმარტავენ, რომ საოლქო საარჩევნო კომისიებში ამ დროისათვის 15 საჩივარია შესული.

გუშინ, 21 ნოემბერს ჩატარდა საპარლამენტო არჩევნების მეორე ტური, სადაც არცერთი ოპოზიციური პარტია მონაწილეობდა. ისინი აცხადებენ, რომ არჩევნები გაყალბდა. თუმცა, კანონის თანახმად, ტექნიკურად მათი სახელები ბიულეტენებში მაინც იყო. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც.

როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებებს არ ჩაატარებდნენ და სრულ იგნორირებას გამოუცხადებდნენ.

მეორე ტური მიმდინარეობს იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.