დედაქალაქის მერმა, კახა კალაძემ ფეისბუქ ლაივიდან მოქალაქეებს ჯერ ჩაბნელებული კიკვიძის პარკიდან მიმართა და მათ ჰკითხა, თუ მოსწონდათ ასეთი ბნელი ქალაქი. მოგვიანებით კი, პარკი გაანათა და აღნიშნა, რომ თბილისი წელსაც განათებული შეხვდება ახალ 2021 წელს. ასე გამოეხმაურა კალაძე მერიის მიერ საახალწლო განათებების შესყიდვასთან დაკავშირებით საზოგადოების კრიტიკას.
“ყოველწლიურად ბიუჯეტი, დაახლოებით, 11-12 მილიონ ლარს ხარჯავს. ანუ რა არის ჩვენი მიდგომა, რომ ქუჩებიც ჩავაბნელოთ? აღარ გადავიხადოთ ეს 12 მილიონი იმისთვის, რომ ქალაქი ღამით ულამაზესი იყოს? მეგობრებო, დიდებო, პატარებო, თბილისელებო, დედაქალაქის სტუმრებო, მინდა ყველას გითხრათ, რომ გპირდებით, წელს საახალწლო თბილისი იქნება ისეთივე ლამაზი და სავსე სადღესასწაულო განწყობით, როგორც გასულ წლებში, თუმცა იქნება მოკრძალებული, მაგრამ, რა თქმა უნდა, იქნება ულამაზესი”, — აღნიშნა კალაძემ.
მისი თქმით, საქართველო არასოდეს დაუბრუნდება წარსულს და სიბნელეს. კალაძის განცხადებით, არცერთი საახალწლო ნათურა სახლში არ მიაქვს არავის და ყველა ხარჯი, რაც დედაქალაქის ბიუჯეტმა გაიღო, ხმარდება თბილისს.
10 ნოემბერს თბილისის მერიამ საახალწლო ილუმინაციების მონტაჟი დაიწყო.
კომენტარები