პარლამენტის ვიცე-სპიკერი, გია ვოლსკი ამბობს, რომ აშშ-ს სახელმწიფო მდივანთან, მაიკ პომპეოსთან არაერთ სერიოზულ საკითხს და არა მარტო არჩევნებს განიხილავენ. ამის შესახებ მან რუსთავი 2-ის ეთერში.
“გავიმეორებთ, ალბათ, იმას, რაც ამერიკის შეერთებულმა შტატებმა თავისი ელჩის სახით უკვე განაცხადა, ჩატარდა არჩევნები და ამ არჩევნებთან დაკავშირებით ყველამ პასუხი უნდა აგოს იმ ადამიანებზე, ვინც მათ ხმა მისცა. რომ არჩევნები იყო ჩატარებული ფუნდამენტური უფლებების დაცვით და სტანდარტები იყო დაცული საარჩევნო პროცესის მიმდინარეობაში. მე საკითხების ამ კუთხით განხილვას არ ველოდები, რომ რას შვრებით ბიჭებო, რას აპირებთ, იქნება შევცვალოთ ეს და სანამ არ გაიმარჯვებს ნაცმოძრაობა, იქამდე ვატაროთ და ვატაროთ არჩევნებიო. ასეთი გულუბრყვილო შეხედულებები უნდათ მოახვიონ თავს საზოგადოებას”, — განაცხადა ვოლსკიმ.
მისივე თქმით, პომპეოს ჩამოსვლა განპირობებულია მძიმე ეკონომიკური ვითარებით რეგიონში და არასტაბილური ურთიერთობა მსოფლიოში.
აშშ-ს სახელმწიფო მდივანი, მაიკ პომპეო თბილისს 17-18 ნოემბერს ეწვევა. როგორც საქართველოს საგარეო საქმეთა სამინისტროში აცხადებენ, ვიზიტის ფარგლებში სახელმწიფო მდივანი შეხვედრებს გამართავს პრემიერმინისტრ გიორგი გახარიასთან, საქართველოს პრეზიდენტთან სალომე ზურაბიშვილთან და საგარეო საქმეთა მინისტრ დავით ზალკალიანთან. მაიკ პომპეო თბილისში, ასევე, შეხვდება სრულიად საქართველოს კათოლიკოს-პატრიარქ ილია II-ეს.
კომენტარები