ვირუსის გავრცელების მხრივ, საქართველო დღიურად სამ მეზობელ ქვეყანას უსწრებს

დღეს საქართველოში კორონავირუსის 2 859 ახალი შემთხვევა დადასტურდა, რაც იმას ნიშნავს, რომ ჩვენი ქვეყანა კორონავირუსის გავრცელების მხრივ, მეზობელი ქვეყნების, სომხეთის, აზერბაიჯანისა და თურქეთის მონაცემებსაც უსწრებს.

„პრაიმტაიმი“ გთავაზობთ, 7 ნოემბრის მონაცემებით საქართველოს მეზობელ ქვეყნებში კორონავირუსის გავრცელების ტენდენციას.

სომხეთში ბოლო დღე-ღამის განმავლობაში კორონავირუსის 2 476 ახალი შემთხვევა გამოვლინდა, ინფიცირებულთა საერთო რაოდენობა 104 249-მდე გაიზარდა. საერთო ჯამში, დაღუპულთა რიცხვმა 1 533-ს მიაღწია.

აზერბაიჯანში ბოლო 24 საათის განმავლობაში კორონავირუსის 1 364 ახალი შემთხვევა გამოვლინდა. საერთო ჯამში დადასტურებულმა შემთხვევებმა 60 873-ს მიაღწია. ჯამში, ვირუსისგან გარდაცვლილა 794 ადამიანი.

თურქეთში დღეს ვირუსის 2 311 ახალი შემთხვევა გამოვლინდა.საერთო ჯამში, ინფიცირებულია 386 820 ადამიანი. სულ გარდაიცვალა 10 639 პაციენტი.

რუსეთში ბოლო 24 საათის განმავლობაში კორონავირუსის 20 582 ახალი შემთხვევა დადასტურდა. ჯამში, გამოვლენილია კორონავირუსის 1 733 440 შემთხვევა, სულ გარდაიცვალა 29 887 პაციენტი.

ინფორმაციისთვის, დღეს საქართველოში კორონავირუსის 2859 ახალი შემთხვევა გამოვლინდა, გამოჯანმრთელდა  2754 პაციენტი. ამის შესახებ ინფორმაცია stopcov.ge-ზე ცოტა ხნის წინ განახლდა. ამ დროისთვის საქართველოში კორონავირუსის 54 852 შემთხვევაა დადასტურებული.

გამოჯანმრთელებულთა რაოდენობა 39 773-ს შეადგენს.კარანტინის რეჟიმშია 3160 მოქალაქე, ხოლო სტაციონარში მეთვალყურეობას 4489 ადამიანი გადის. კოვიდსასტუმროში მყოფი ადამიანების რაოდენობა 2446-ს შეადგენს. უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.