“ბიძინამ თავზე დაგვახია არჩევნები” – რა ხდება ბათუმში?

ბათუმი 31 ოქტომბერს არჩევნების გაყალბების წინააღმდეგ გამოდის. ამ დროისთვის აჭარის უმაღლესი საბჭოს შენობისკენ, ქალაქის სხვადასხვა ლოკაციიდან ასეულობით დემონსტრანტი დაიძრა. მოსახლეობა მათი თავისუფალი არჩევანის მოპარვას აპროტესტებს და ქუჩაში გამოვიდა. აქცია ოპოზიციის მიერ იყო დაგეგმილი მას შემდეგ, რაც გაერთიანებული ოპოზიცია “ძალა ერთობაშიამ” აჭარის უმაღლესი საბჭოს მანდატებზეც უარი თქვა. მეორე ტურში მონაწილეობას არ აპირებს არც “ნაციონალური მოძრაობის” ბათუმის მაჟორიტარი დეპუტატობის კანდიდატი, ლევან ვარშალომიძე.

“გაგვიყალბეს არჩევნები და წაგვართვეს კონსტიტუციური უფლება”, – ამბობენ უმაღლესი საბჭოს შენობის წინ შეკრებილები. მთავრობის სახლის წინ ყველა ოპოზიციური პარტიის წარმომადგენელია, “ქართული მარშის ” გარდა.

ჩვენ ვიყავით და ვართ ძალიან ბევრი, 31 ოქტომბერს ბიძინა ივანიშვილმა და შავბნელმა ძალამ თავზე გადაგვახია არჩევნები. შევარჩინოთ? – ჰკითხა ლევან ვარშალომიძემ აქციის მონაწილეებს. 

მისი თქმით, აქ იქნებიან მანამ, სანამ არ დაინიშნება ხელახალი არჩევნები და ეს არის საზოგადოების დაკვეთა.

შეკრებილებს მიმართეს ოპოზიციის სახვა წარმომადგენლებმაც.  

ამასთან, გუშინ ბათუმის ცენტრში წარწერები “იმოქმედე” გამოჩნდა, რომელიც ამავე სახელწოდების ახალგაზრდული ორგანიზაციის წევრებმა ბათუმის ბულვარში და სხვა ღირშესანიშნავ ადგილებში გააკეთეს, თუმცა, შესაბამისი ადგილობრივი სამსახურების წარმომადგენლებმა წარწერები რამდენიმე საათში წაშალეს.  

წყარო – “მთავარი”