აზერბაიჯანი და სომხეთი ერთმანეთს ახალი სამშვიდობო შეთანხმების დარღვევაში ადანაშაულებენ. აზერბაიჯანის თავდაცვის სამინისტროს განცხადებით, სომხურმა მხარემ ზავი დაარღვია და ჯებრაილის მიმართულებით გახსნა ცეცხლი.
ერევანი ბაქოს საპასუხო ბრალდებას უყენებს. სომხეთის თავდაცვის სამინისტროს მტკიცებით, ცეცხლის შეწყვეტის რეჟიმი პირველმა აზერბაიჯანმა დაარღვია. შეთანხმებას, რომლის მიხედვითაც 18 ოქტომბრის 00.00-დან ცეცხლი უნდა შეწყვეტილიყო, მხარეებმა გუშინ მიაღწიეს, თუმცა ზავი კიდევ ერთხელ დაირღვა.
პირველად სომხეთი და აზერბაიჯანი ცეცხლის შეწყვეტაზე 10 ოქტომბერს, რუსეთის შუამავლობით შეთანხმდნენ, თუმცა შეთანხმება 24 საათში დაირღვა.
სომხეთისა და აზერბაიჯანის საზღვარზე ვითარება 27 სექტემბერს დაიძაბა. პრემიერ-მინისტრის, ნიკოლ ფაშინიანის განცხადებით, აზერბაიჯანმა მთიანი ყარაბაღის მიმართულებით საჰაერო და საარტილერიო შეტევა დაიწყო. აზერბაიჯანული მხარის განმარტებით კი, ისინი სომხეთის მხრიდან, მთელი ფრონტის ხაზზე სროლებს პასუხობდნენ. ორივე მხარე იუწყება, რომ დაღუპულია მშვიდობიანი მოსახლეობა.
კომენტარები