ბიზნესმენი დავით ხიდაშელი, რომელმაც ქართულ მხარეს კარტოგრაფიული რუკების დედნები მიაწოდა, თბილისში დღეს დაბრუნდება. ის პრესკონფერენციის გამართვას და მედიის შეკითხვებზე პასუხის გაცემას გეგმავს.
ხიდაშელი საქართველოს მოქალაქეა და 1993 წლიდან შვეიცარიაში მუშაობს. რაც შეეხება მის პერსონას, ის საინტერესო გახდა მას შემდეგ, რაც გაირკვა, რომ აზერბაიჯანის საგარეო საქმეთა მინისტრის თბილისში ვიზიტისას, დავით ზალკალიანის მიერ აზერბაიჯანული მხარისთვის გადაცემული მასალა იმ რუკებსაც მოიცავდა, რომელიც დავით ხიდაშელის მონაწილეობით არის მოძიებული და რომელიც სადავო ტერიტორიის კუთვნილების შესახებ უფრო მეტ სიცხადეს აჩენს.
დავით ხიდაშელი 30 წელია ტექნოლოგიურ სფეროში საქმიანობს და ევრო კავშირის და მსოფლიოს 40 ქვეყანაში ბიზნეს პროექტებს ხელმძღვანელობს, მათ შორის საერთაშორისო ორგანიზაციების ეგიდით.
კარტოგრაფია მისი პროფესიის ერთ-ერთი ძირითადი მიმართულებაა. ორგანიზაცია, რომელსაც ამჟამად ხელმძღვანელობს, ასობით ათას რუკას ფლობს და წვდომა აქვს მრავალ კარტოგრაფიულ და ანალიტიკურ მასალაზე. შესაბამისად, მას ხელი მიუწვდება მსოფლიოს თითქმის ყველა ქვეყნის სხვადასხვა კლასიფიკაციის თუ დანიშნულების რუკებზე.
კომენტარები