ბათუმი-ჩაქვის გზაზე ავარიის შედეგად დაშავებული მეორე ბავშვიც გარდაიცვალა

9 აგვისტოს ბათუმი-ჩაქვის დამაკავშირებელ ცენტრალურ გზაზე მომხდარი ავტოსაგზაო შემთხვევის შედეგად დაშავებული მეორე, 7 წლის ბავშვი დღეს გარდაიცვალა.

არასრულწლოვანი ოთხი დღის განმავლობაში იაშვილის სახელობის ბათუმის დედათა და ბავშვთა ცენტრალური ჰოსპიტალის რეანიმაციულ განყოფილებაში მართვით სუნთქვაზე იმყოფებოდა.

შეგახსენებთ, რომ 9 აგვისტოს მსუბუქი ავტომანქანა მახინჯაურში ქვეითებს დაეჯახა.

ავტოსაგზაო შემთხვევის შედეგად ადგილზე სამი ადამიანი გარდაიცვალა, მათ შორის ერთი 12 წლის ბავშვი. მეორე არასრულწლოვანის გარდაცვალების შესახებ კი დღეს გახდა ცნობილი.

დაშავებულებიც და გარდაცვლილებიც ერთი ოჯახის წევრები არიან.

მძღოლი დაკავებულია. შინაგან საქმეთა სამინისტროს ინფორმაციით გამოძიება 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს, რამაც ადამიანის სიცოცხლის მოსპობა გამოიწვია.

„პრაიმტაიმი“