„გამომძიებელ ჟურნალისტთა გაერთიანება“ აიფაქტი სოციალურ ქსელში მიტროპოლიტ იობის (აქიაშვილის) ქონების შესახებ კვლევას აქვეყნებს, გთავაზობთ ამონარიდს გამოქვეყნებული ინფორმაციიდან:
„მასზეა რეგისტრირებული 20 ათასი კვ.მ. მიწა შენობა-ნაგებობებით და ერთი ბინა თბილისში:
1. 9,300 კვ.მ. ქარელში, სოფელ ელბაქიანთკარში 2009 და 2015 წლებში შეიძინა;
2. 75 კვ.მ. ბინა თბილისში, ორთაჭალაში 2016 წელს შეიძინა;
3. 2,280 კვ.მ. მიწა ურეკში 2016 წელს შეიძინა;
4. 1,983 კვ.მ. მიწა ყაზბეგში, სოფელ სნოში 2017-2018 წლებში შეიძინა;
5. 6,500 კვ.მ. მიწა, ორი შენობით სამტრედიაში, სოფელ მელაურში 2019 წელს შეიძინა.
საჯარო რეესტრიდან კვლავ ველით მიტროპოლიტის მიერ გაფორმებულ ნასყიდობის ხელშეკრულებების ნაწილს და მიღებისთანავე განვაახლებთ ტექსტს.
მიტროპოლიტი იობი ხელმძღვანელობს სამ არაკომერციულ ორგანიზაციას:
1. მაცხოვრის აღდგომის სახელობის სამონასტრო კომპლექსის მშენებლობის ფონდი;
2. წმინდა პანტელეიმონ მკურნალის სახელობის ხაშურის სასულიერო გიმნაზია;
3. ურბნისისა და რუისის ეპარქიის ეკლესია-მონასტრების აღორძინების კავშირი.
მიტროპოლიტს ცუდი ურთიერთობა არც სახელმწიფო სტრუქტურებთან აქვს. მისი რეზიდენციის მოსაწყობად სახელმწიფომ 2018 წლის მარტში ქარელში, ცაბაძის ქუჩაზე 7,000 კვ.მ.-ზე მეტი მიწა და მასზე არსებული 1,153 კვ.მ შენობა-ნაგებობა საპატრიარქოს აჩუქა.
მომდევნო წლებში კი ქარელის მერიამ მიტროპოლიტს შენობის შესარემონტებლად 250,000 ლარი გადასცა, მათ შორის 100,000 ლარი 2020 წლის დასაწყისში, როცა ქვეყანა პანდემიის გამო საგანგებო ვითარებაში უნდა ყოფილიყო.“
კომენტარები