,, რისი სუნი უდის ამ ყველაფერს? თქვენც იგივე სუნი გცემთ როგორც მე?” – სააკაშვილი

მიხეილ სააკაშვილი ციხიდან წერილს აქვეყნებს:

,,გამაოგნებელია რომ კიდევ დარჩა ვიღაც, ვინც გილაურის გათეთრების სპეცოპერაციას ჯერ კიდევ გილაურის “დევნას” უწოდებს?

თურმე რამდენიმე მილიონი არ აღმოაჩნდა ყადაღის გამოსახსნელად და საბრალოს სახლი გაუყიდეს. ე. ი. დასაჯეს თავისუფლებისთვის ბრძოლისთვის. ხოდა მინდა დავსვა რამდენიმე კითხვა.

გილაურისგან ფულის ამღები პოლიტიკოსები ადასტურებენ მინიმუმ 20 მილიონის აღებას, სხვები საუბრობენ რომ 20 კი არა 40 მილიონი გადაიხადა გილაურმა ერთობის ჩაშლაში. ყველა შემთხვევაში, თუ ამდენი ფული პარტიისთვის მისაცემად ჰქონდა, საკუთარი სახლისთვის 4 თუ 7 მილიონი არ აღმოაჩნდა? და თუ არ აღმოაჩნდა, ე.ი. ის 20 და 40 მილიონი მისი არ იყო და თუ არ იყო, აბა ვისი იყო?

შემდეგი კითხვა, რომელიც მინდა დავსვა – აი ამ “პოლიტიკური დევნის” დროს, გილაურებმა დაკარგეს “საქართველოს ბანკი?” თუ არ დაკარგეს, ბანკს მოგება შეუმცირდა მაინც? – არა. ირკვევა რომ გაიზარდა და 2 მილიარდს აჭარბებს (საბრალომ კი 4 მილიონი ვერ გამონახა).

კიდევ ერთი მოკრძალებული კითხვა მინდა დავსვა – გილაური საკუთარ “გაყიდულ” სახლში აღარ ცხოვრობს? თუ მისმა უახლოესმა მეგობარმა, ვინმე სტურუამ, რომელმაც ეს სახლი “იყიდა”, თავისი ძმაკაცი გილაური ქუჩაში გამოაგდო?

ხოდა ახლა მოაზროვნე ხალხს მინდა ვკითხო – რისი სუნი უდის ამ ყველაფერს? თქვენც იგივე სუნი გცემთ როგორც მე?

ერთიანობას ალტერნატივა არ აქვს, მაგრამ ეს უნდა იყოს ერთობა დაფუძნებული პრინციპებზე და ერთ-ერთი მთავარი პრინციპია – არცერთი გარიგება დიქტატურის საცეცებთან და ამ საცეცებისთვის, მანიპულირების შესაძლებლობების არ დაშვება.

რაც შეეხება გილაურს, ყველა უნდა შეეშვას თავის მოტყუებას და ხალხის იდიოტებად გამოყვანას. სიმართლე არის ერთი, სეპარატული გარიგებები კულისებში და პოლიტიკურ ყიდვა-გაყიდვას გამართლება ვერცერთ შემთხვევაში ვერ ექნება.“