ნაცმოძრაობის წევრი, ლაშა ფარულავა:
,,მთელი ზაფხული საჭესთან გავატარე. მოვიარე სამეგრელო, გურია, იმერეთის ნაწილი, შიდა და ქვემო ქართლი, მცხეთა-მთიანეთი და ბათუმიც. ათასობით ადამიანთან საუბარმა ერთი რამ განსაკუთრებით მკაფიოდ დამანახა: ხალხის განწყობას ვეღარ შეცვლის რეჟიმის ვერც ერთი პროპაგანდისტული კამპანია.
ადამიანების ნაწილს რეჟიმის რეპრესიისა და ზეწოლის ეშინია, მაგრამ მათი მთავარი პროტესტი გაცილებით მარტივ და ყოველდღიურ რამეს უკავშირდება: კორუფციასა და გაძვირებულ ცხოვრებას.
ხალხი ხედავს, რომ ფასები იზრდება, შემოსავლები ვერ ეწევა ხარჯებს და ამ გაძვირების პარალელურად იზრდება იმ ადამიანების ქონება, რომლებიც ოცნებასთან არიან დაკავშირებული.
სწორედ ამიტომ, კორუფციასთან ბრძოლა მხოლოდ მხილება არ არის.
საჭიროა უსამართლობის წინააღმდეგ პოლიტიკური და სამართლებრივი ბრძოლა, კონკრეტული ფაქტების გამოვლენა, პასუხისმგებელი პირების დასახელება და მოპარული სახელმწიფო რესურსის საზოგადოებისთვის დაბრუნება.
ქვეყნის შეცვლის ფორმულა არც ღარიბაშვილის ცრემლიანი ეპისტოლეების განხილვაა და არც ხელისუფლების შიდა ინტრიგების კომენტირება.
ფორმულა მარტივია: ხალხის ყოველდღიურ პრობლემებზე დარტყმა, კორუფციული სქემების გამოვლენა და იმ სისტემასთან შეურიგებელი ბრძოლა, რომელიც მოქალაქის ჯიბიდან მიღებულ ფულს საკუთარი ძალაუფლების გასამყარებლად იყენებს.
ხალხს უკვე აღარ სჭირდება ახსნა, რატომ არის ცხოვრება ძვირი. ხალხმა იცის, ვინ იხდის ამ ფასს.
ახლა საჭიროა პასუხი ერთ კითხვაზე: ვინ მდიდრდება ხალხის გაღარიბებით?“
კომენტარები