თბილისში გარდაცვლილი აფხაზი ბლოგერის, დაურ ბუავას ყოფილი მეუღლე ნინო ცხოვრებაძე ტელეგრამ-არხზე ემოციურ მიმართვას ავრცელებს და საზოგადოებას დაუდასტურებელი ინფორმაციის გავრცელებისგან თავის შეკავებისკენ მოუწოდებს.
„დაური ყოველთვის ძალიან ჯიუტი იყო ექიმებთან მისვლის საკითხში… ხშირად ჰქონდა მაღალი წნევა და გულიც აწუხებდა. ორი კვირის წინ ძალიან ცუდი სიზმარი დამესიზმრა, სადაც მან გულზე ხელი მიიდო და დაეცა. იმავე დღეს, როცა პარკში ვიყავი და უმიზეზოდ ტირილი დავიწყე, აღმოჩნდა, რომ დაური გადაღებებზე წაიქცა, თავი ქვას დაარტყა და 3 საათი უგონოდ იწვა… ამ სიზმრიდან სულ რაღაც ერთი კვირა გავიდა და დაური გარდაიცვალა.
როცა საქართველოში გადმოვიდა, აქ არავის იცნობდა. იმ პერიოდში მისი ხელფასი 800 ლარი იყო, ბინის ქირა კი – 700. არასდროს დამავიწყდება, 8 მარტს როგორ მაჩუქა ქოთნის ყვავილი, თმის რეზინი და შოკოლადი… შემდეგ აიფონებსა და ძვირად ღირებულ საჩუქრებსაც მჩუქნიდა, მაგრამ იმ 8 მარტს არაფერი დამავიწყებს.
დაურს ძალიან ბევრი ცუდი ადამიანი ეხვია გარშემო… მას ყოველდღე წერდნენ და ურეკავდნენ – ზოგი მხარს უჭერდა, ზოგი კი სიკვდილს უსურვებდა. არ ვიცი, საიდან პოულობდა მისი ლამაზი სული იმდენ ძალას, რომ ამ ყველაფერს გამკლავებოდა.
გარდაიცვალა, მაგრამ არ მოკლეს! ექსპერტიზის ზუსტი შედეგები ჯერ არ არის ცნობილი. გთხოვთ, ნუ წერთ დაუფიქრებელ ვარაუდებს და ნუ გავავრცელებთ დეზინფორმაციას… წადით და ჩაეხუტეთ თქვენს საყვარელ ადამიანებს, უთხარით, თუ რამდენად გიყვართ.” – წერს ნინო ცხოვრებაძე
ცნობისთვის, აფხაზი ბლოგერი, დაურ ბუავა თბილისში, ნაქირავებ ბინაში გარდაცვლილი იპოვეს. საქმეზე მიმდინარეობს გამოძიება. დღეს შსს-მ ბუავას გარდაცვალების საქმეზე უცხო ქვეყნის მოქალაქე დააკავეს.
კომენტარები