მასაჩუსეტის უნივერსიტეტის პროფესორი, ზურაბ გურული:
პოლიტიკოსების და მათი ამომრჩევლების ლოგიკაზე, მორალსა და პრინციპებზედ.
ფიქრები შუაკვირაში …
————–
ამერიკულ იურისპრუდენციას აქვს ასეთი კანონი, მეუღლეებს კანონით არ ევალებათ ერთმანეთის წინააღმდეგ ჩვენების მიცემა. ლოგიკურია. იურისპრუდენცია თვლის, რომ მეუღლეთა ურთიერთობის ადამიანური მორალის შენახვა უფრო მნიშვნელოვანია საზოგადოების სულიერი სიჯანსაღისათვის, ვიდრე პრეცედენტის შექმნა, რომ მეუღლეები კანონით აიძულო ერთმანეთის მიმართ ადამიანური ნდობა შეურაცხყონ.
პეტერ მადიარმა საკუთარი მეუღლე, საკუთარი სამი შვილის დედა, საკუთარ სახლში, ინტიმურ გარემოში გულახდილი საუბრის დროს ტელეფონზე ჩაიწერა და მერე ეს საუბარი საჯაროდ გამოაქვეყნა როგორც მტკიცებულება, რომ ორბანის მთავრობა კორუმპირებული იყო.
იუდით ვარგა, მადიარის ცოლი და ორბანის იუსტიციის მინისტრი, არ ყოფილა ცუდი ადამიანი. როგორც ჩანს, მას ქეჯნიდა სინდისი და მეუღლე გამოიყენა აღსარებისათვის.
იუდითი რომ ცუდი ადამიანი არ არის, იქედანაც ჩანს, რომ იგი თავისი ნებით გადადგა თანამდებობიდან, როდესაც ორბანმა ვიღაც პედოფილს ააცილა პასუხისმგებლობა დანაშაულისათვის.
ცხადია, მადიარი სასულიერო პირი არ არის და აღსარების საიდუმლოს დარღვევა იგივე ცოდვად არ ჩაეთვლება, მაგრამ როგორც ადამიანი აშკარად ნაძირალაა.
სამაგიეროდ, ბატონი მადიარი უყვარს საზოგადოებას, რადგან საზოგადოება თვლის, რომ პეტერისთვის სამშობლო ყველაფერზე მაღლა დგას, საკუთარ ცოლშვილზეც კი და რომ იგი ააყვავებს უნგრეთს და გამოადგება ევროპულ დემოკრატიას.
“ასეთი ადამიანი არანაირი ნდობის ღირსი არ არის” – განაცხადა გამწარებულმა იუდით ვარგამ. შეეკამათებით?
მე არა. სრულიად ვეთანხმები.
დანიური ფილმია ერთი, სადაც სკოლის მასწავლებელი უფროსკლასელებს მისცემს დავალებას, რომ არჩევანი გააკეთონ სამ პოლიტიკურ კანდიდატს შორის.
პირველი კანდიდატი არის ცბიერი, ასაკოვანი ინვალიდი, რომელსაც საყვარლად ჰყავს თავისი ცოლის მდივანი და რომელიც თავისი შეხედულებისამებრ არღვევდა ადამიანის უფლებებს.
მეორე კანდიდატი არის უხეში, უტაქტო ლოთი, მძიმე მწეველი. ახირებული და ჯიუტი; რომლის სიჯიუტესაც არაერთი ათასი ადამიანი ემსხვერპლა. ცნობილია თავისი შეურაცხმყოფელი დამოკიდებულებებით ქალების მიმართ.
მესამე არის ზრდილობიანი, ქალების და ოჯახური ტრადიციების პატივისმცემელი, ცხოველების მოყვარული, ემოციური ვეტერანი.
ახალგაზრდებმა ერთხმად აირჩიეს მესამე კანდიდატი – ადოლფ ჰიტლერი და დაიწუნეს რუზველტი და ჩერჩილი.
პატრიოტიზმი არ არის ნაძირლების უკანასკნელი თავშესაფარი; ის ბოლოს წინაა; უკანასკნელი კი მორალია.
როგორ უნდა გაერკვეს ამ აბრაკადაბრაში რიგითი ამომრჩეველი?
არ არის იოლი კითხვა.
ვისაც შესაძლო პასუხები აინტერესებს, შემოგვიერთდით რადიო “დარიოზე” შაბათს, ვიმსჯელოთ …
კომენტარები