სახელმწიფო უწყებები ავტომობილების იმპორტისას აქციზს აღარ გადაიხდიან – კანონპროექტი

სახელმწიფო უწყებები ავტომობილების იმპორტისას აქციზს აღარ გადაიხდიან – ამას ითვალისწინებს “საგადასახადო კოდექსში დაგეგმილი ცვლილებები, რომელიც მმართველის პარტიის წარმომადგენლებმა პარლამენტში დააინიციირეს.

კანონპროექტის ავტორები “ქართული ოცნების დეპუტატები – შოთა ბერეკაშვილი, ანტონ ობოლაშვილი, გიორგი ბარვენაშვილი, თორნიკე ბერეკაშვილი, ლევან მაჭავარიანი და მარიამ ლაშხი არიან. ეს ცვლილება მოჰყვა საგადასახადო კოდექსში შეტანილ წინა კანონს, რომლითაც 2026 წლის პირველი აპრილიდან საქართველოში ავტომობილების იმპორტის აქციზი მკვეთრად გაიზარდა, შესაბამისად ახალი კანონპროექტით ერთადერთი გამონაკლისი, ვისაც ავტომობილების აქციზის გადახდა საერთოდ არ მოუწევს თავად სახელმწიფო იქნება.

“მოქმედი საგადასახადო კანონმდებლობის შესაბამისად, სახელმწიფო საკუთრებაში მიქცეული საქონლის იმპორტი არ თავისუფლდება აქციზის გადასახადისგან. შესაბამისად, იმ შემთხვევებში, როდესაც აქციზის გადასახადით დასაბეგრი საქონელი გადადის სახელმწიფოს საკუთრებაში, სახელმწიფოს უჩნდება ვალდებულება მოახდინოს მისთვის გადაცემული საქონლის თავისუფალ მიმოქცევაში გაშვების პროცედურაში მოქცევა და შესაბამისად, აქციზის გადასახადით დაბეგვრა, რაც დამატებით ტვირთად აწვება სახელმწიფო ბიუჯეტს და ართულებს ასეთი საქონლის სახელმწიფოს მხრიდან შემდგომ განკარგვას. ამასთან, ასევე გასათვალისწინებელია, რომ სახელმწიფო საკუთრებაში მიქცეული საქონელი მოქმედი კანონმდებლობით თავისუფლდება დამატებული ღირებულების და იმპორტის გადასახადებისგან. არსებული პრობლემების ეფექტიანი გადაწყვეტა შეუძლებელია მოქმედი რეგულაციების ფარგლებში, რის გამოც აუცილებელია საკანონმდებლო ცვლილებების განხორციელება, საქართველოს საგადასახადო კოდექსში ცვლილების შეტანის გზით, რომლის მიხედვითაც სახელმწიფო საკუთრებაში მიქცეული საქონლის იმპორტი გათავისუფლდება აქციზის გადასახადისგან“, – ნათქვამია კანონპროექტის განმარტებით ბარათში.

შეგახსენებთ, რომ 2026 წლის პირველი აპრილიდან აქციზის განაკვეთი მსუბუქი ავტომობილებისთვის ასე ნაწილდება:

• 1 წლამდე ავტომობილებისთვის – მოქმედია 1 სმ³-ზე 1.5 ლარი; იქნება 1.5 ლარი, მატება 0%;
• 1 წლის ავტომობილებისთვის – მოქმედია 1.5 ლარი; იქნება 1.5 ლარი, მატება 0%;
• 2 წლის ავტომობილებისთვის – მოქმედია 1.5 ლარი; იქნება 1.5 ლარი, მატება 0%;
• 3 წლის ავტომობილებისთვის – მოქმედია 1.4 ლარი; იქნება 1.5 ლარი, მატება 7%;
• 4 წლის ავტომობილებისთვის – მოქმედია 1.2 ლარი; იქნება 1.5 ლარი, მატება 25%;
• 5 წლის ავტომობილებისთვის – მოქმედია 1 ლარი; იქნება 1.5 ლარი, მატება 50%;
• 6 წლის ავტომობილებისთვის – მოქმედია 0.8 ლარი; იქნება 1.5 ლარი, მატება 88%;
• 6 წლის და მეტი ავტომობილები – მოქმედია 0.8 ლარი; იქნება 4.5 ლარი, მატება 560%. (ბიემჯი)