საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
ვიღაცები ამბობენ, 9 აპრილი არ უნდა მომხდარიყო და ქართველ ხალხს არ უნდა ებრძოლა, საბჭოთა კავშირი თავისით დაიშლებოდაო, და მშრალზე გამოვიდოდით, როგორც ყაზახეთი გამოვიდაო.
დავიწყოთ იმით, რომ 9 აპრილი ჰაერიდან არ ჩამოვარდნილა. ამ ყველაფრის საწყისი რუსეთის მხრიდან აფხაზეთში სეპარატიზმის ხელშეწყობა და ქართული იდენტობის ეტაპობრივი განადგურება იყო. ჯერ იყო და რუსეთის წახალისებით, 1989 წლის მარტში, ლიხნის კრება ჩაატარეს და შემდეგ სოხუმში, ომამდე ჯერ კიდევ 3 წლით ადრე, 1989 წლის ივლისში ქართველ ახალგაზრდებს იმიტომ ხოცავდნენ, რომ ქართველები იყვნენ და ქართულად სწავლა უნდოდათ. მოკლეს ვლადიმერ ვეკუაც.მეორეც, სწორედ 9 აპრილის ბრძოლამ მოგვიტანა იმის რწმენა, რომ ბრძოლას აქვს აზრი და მოპოვებული უნდა დავიცვათ. ბოლოს და ბოლოს დაღუპულების წინაშე გვაქვს ვალი. თუ რაღაცისთვის არ გიწვალია, ენერგია არ ჩაგიდია და არ გიბრძოლია, არც იმის ფასი იცი და ადვილად თმობ ან კარგავ მას. დამოუკიდებლობა ნაჩუქარი არ არის.
და მესამე: დიახ, ყაზახეთი საქართველოს, ლიეტუვას, ესტონეთსა და სხვა მებრძოლ ქვეყნებს უნდა უმადლოდეს რომ საბჭოთა კავშირი დაიშალა, თორემ არავის ხმა რომ არ ამოეღო ისევ საბჭოთა კავშირში იქნებოდა და ყაზახეთში ყაზახი ტოტალურ უმცირესობაში იქნებოდა. და არც დღეს არ აქვთ კარგი მდგომარეობა – ქვეყანა დღემდე იდენტობის ძიების პროცესშია და ჩრდილოეთ ნაწილი რუსიფიცირებულია.
კომენტარები