კობახიძე “კუკუშკის” აღდგენას აანონსებს

ბორჯომი-ბაკურიანის ე.წ. კუკუშკას რეაბილიტაცია ჩაუტარდება – ამის შესახებ ირაკლი კობახიძემ მთავრობის სხდომაზე განაცხადა.

„მივიღე გადაწყვეტილება და ეს არის გეგმის [საქართველოს რკინიგზის განვითარების 2026 -2028 წლების სამოქმედო გეგმა] ნაწილი, ბორჯომ-ბაკურიანის ისტორიული მატარებლის, ე.წ. კუკუშკის რეაბილიტაციის თაობაზე. სრული რეაბილიტაცია ჩაუტარდება როგორც მატარებელს, ისე სარკინიგზო ინფრასტრუქტურას და განხორციელდება 5 შესაბამისი სარკინიგზო სადგურის რეაბილიტაცია. ეს ხაზიც იყო 2020 წლიდან გაჩერებული და გეგმის მიხედვით, მატარებელი მომავალი წლის იანვრიდან მოემსახურება ჩვენს მოქალაქეებს და ჩვენი ქვეყნის სტუმრებს. ტურისტული თვალსაზრისითაც დიდი მნიშვნელობა აქვს რკინიგზის ამ ხაზის აღდგენას“,- განაცხადა კობახიძემ.

“კუკუშკამ” მუშაობა პანდემიის პერიოდში შეაჩერა და მას შემდეგ აღარ ამოქმედებულა. ცნობისთვის, მაშინ, ის სწორედ იმ მიზეზით შეჩერდა, რომ რეაბილიტაცია უნდა დაწყებულიყო.

ჯერ კიდევ 2019 წელს, საქართველოს რკინიგზამ განაცხადა, რომ სალიანდაგო ინფრასტრუქტურის სარეაბილიტაციო სამუშაოების ფარგლებში, საგარეუბნო მატარებლის („კუკუშკის“) მოძრაობა შეიზღუდება. სარკინიგზო ხაზზე სამუშაოებს კი შპს „ჯიარ ბორჯომი-ბაკურიანი“ აწარმოებდა.

2017 წელს ბორჯომ-ბაკურიანის რკინიგზის კომპლექსს „კუკუშკასა” და ეიფელის ხიდთან ერთად კულტურული მემკვიდრეობის უძრავი ძეგლის სტატუსი მიენიჭა. კომპლექსში შედის და კულტურული მემკვიდრეობის დაცვის წესები ვრცელდება იმ რკინიგზის სადგურებზეც, სადაც მატარებელი აჩერებს. მათ შორისაა წაღვერი და ცემი. ორივე სოფელში სადგურები მიტოვებულია, კარი დაკეტილი, მინები კი ჩამსხვრეული.