დასავლური მედია, ინფორმირებულ წყაროებზე დაყრდნობით წერს, რომ აშშ ირანელი ქურთებით დაკომპლექტებულ დაჯგუფებებთან ერთად ირანში ამბოხების ორგანიზებას განიხილავს.
სამმა წყარომ Reuters-ს განუცხადა, რომ ქურთების შეიარაღებულმა ჯგუფებმა ბოლო დღეებში აშშ-სთან კონსულტაციები გამართეს იმის შესახებ, დაესხნენ თუ არა და როგორ ირანის შეიარაღებულ ძალებს ქვეყნის დასავლეთ ნაწილში.
გამოცემა აღნიშნავს, რომ ირანულ-ქურთული კოალიცია ირან-ერაყის საზღვართან, ერაყის ქურთისტანის ნახევრად ავტონომიურ რეგიონშია გამაგრებული. ორი წყაროს განცხადებით, შესაძლო თავდასხმის მიზანი ისლამური რეჟიმის მოწინააღმდეგე ირანელებისთვის აჯანყების დასაწყებად სივრცის შექმნაა, მას შემდეგ რაც უზენაესი ლიდერი ალი ხამენეი და სხვა მაღალი თანამდებობის პირები აშშ-ისრაელის თავდასხმის შედეგად დაიღუპნენ.
წყაროების თქმით, ოპერაციისა ჩატარებისა და მისი შესაძლო დროის შესახებ საბოლოო გადაწყვეტილება ჯერ მიღებული არ არის.
მათი ინფორმაციით, ჯგუფებმა აშშ-ს სამხედრო მხარდაჭერა მოითხოვეს, ხოლო ბოლო დღეებში ერაყის ლიდერები ერბილიდან და ბაღდადიდან ტრამპის ადმინისტრაციასთან კონტაქტში იყვნენ.
ორი წყაროს თქმით, ქურთული ძალები აშშ-სთან CIA-ის მიერ მათთვის იარაღის მიწოდების შესახებ მოლაპარაკებებს აწარმოებენ.
ქურთულ ძალებთან CIA-ს ჩართულობისა და შესაძლო სახმელეთო ოპერაციის შესახებ ინფორმაცია პირველმა CNN-მა გაავრცელა. ხოლო, Axios-მა ამ კვირაში დაწერა, რომ აშშ-ს პრეზიდენტმა, დონალდ ტრამპმა ერაყის ქურთისტანის ორ მაღალჩინოსან ლიდერთან სატელეფონო საუბარი გამართა.
CNN-ის ინფორმაციით, ქურთულ ძალებს ირანის სასაზღვრო რეგიონში ათასობით შეიარაღებული წევრი ჰყავთ და ზოგიერთი ჯგუფი ამ კვირაში მიანიშნებდა, რომ შესაძლოა, მოქმედებაზე გადავიდეს.(ტაბულა)
კომენტარები