პოლიტიკოსი გია ჯაფარიძე:
„ერთი საყურადღებო ფაქტის შესახებ
საბერძნეთის რესპუბლიკაში დააკავეს საქართველოს მოქალაქე ირანის სასარგებლოდ ჯაშუშობის ბრალდებით. საბერძნეთის რესპუბლიკის დაზვერვა აკვირდებოდა გარკვეული დროის განმავლობაში და მისი აყვანა მოხდა ათენში.
კუნძული კრეტის მარგალიტია ქალაქი ხანია, ხანიას გვერდით არის სუდას სამხედრო ბაზა, რომელიც ნატო-ს და აშშ-ს უმნიშვნელოვანესი სამხედრო ბაზაა ხმელთაშუა ზღვის რეგიონში, უყურებს ჩრდილოეთ აფრიკას, ევროპას და ახლო აღმოსავლეთს. საქართველოს მოქალაქე კრეტაზე სუდას სამხედრო ბაზას უთვალთვალებდა, მის მობილურ ტელეფონში აღმოჩნდა გადაღებული მასალა, მათ შორის, 24 თებერვალს ამერიკული ავიამზიდის “ჯერალდ ფორდის” გავლა სუდას სამხედრო ბაზასთან, როცა ის ისრაელში ხაიფასკენ მიცურავდა.
შემთხვევა ძალიან ჰგავს წინა წელს მომხდარ ამბავს, მაშინაც საქართველოს მოქალაქე დააკავეს, ისიც სუდას ბაზას ზვერავდა. ორივე შემთხვევაში ერთსა და იმავე სასტუმროს იყენებდნენ გასაჩერებლად. ორივე შემთხვევაში საქართველოს მოქალაქე ეთნიკურად აზერბაიჯანულია.
რას შეიძლება ნიშნავდეს ეს? საქართველოს დაზვერვის სამსახური სრულად ჩავარდა, ის დაკავებულია ივანიშვილის გარემოცვის უსაფრთხოებაზე ზრუნვით და ოპოზიციურად განწყობილი მოქალაქეების დევნით და საკუთარ მოვალეობას არ ასრულებს, ან კიდევ უარესი, სხვა ქვეყნის სპეციალურ სამსახურებს თავისუფლად ეძლევათ საქართველოში საქმიანობის საშუალება, მათ შორის, საქართველოს მოქალაქეების გადასაბირებლად.
ფაქტი ბევრ პრობლემაზე მიანიშნებს – ეთნიკური უმცირესობის მდგომარეობა, საქართველოს საერთაშორისო რეპუტაცია, მსგავსი ფაქტების გავლენა სხვა ქვეყნებთან სავიზო რეჟიმზე, უცხო ქვეყნის სამსახურების შეუზღუდავი საქმიანობა და ა.შ.
ამ პრობლემების სათავე არის ქართული ოცნება“
კომენტარები