გენერალური პროკურატურის განცხადებით, დიდი ოდენობით თანხების სავარაუდო გაფლანგვის საქმეზე საგამოძიებო სამსახური სს “ელექტრომოძრავი შემადგენლობის სარემონტო ქარხნის თბილისის ფილიალში” შევიდა. ეს კომპანია თბილისის მეტროს ვაგონების ტექნიკური მომსახურების გაწევით არის დაკავებული. საჯარო რეესტრის თანახმად, მასში 50%-ის წილი ეკუთვნის თბილისის სატრანსპორტო კომპანიას, რომელიც თბილისის მერიის დაქვემდებარებაში არსებული კომპანიაა, 50%-ის წილი კი ეკუთვნის “ინდუსტრიულ ინვესტმენტს”. თავის მხრივ აღნიშნული კომპანიის 50-50%-ის წილი ეკუთვნით გვანცა სალაყაიას და ნოდარ გაგუას. კომპანიის დირექტორია ბიზნესმენი გელა ძიძიკაშვილი. ის “ქართული ოცნების” ერთ-ერთი შემომწირველია. მას მმართველი პარტიისთვის 40 000 ლარი აქვს შეწირული.
სახელმწიფო შესყიდვების სააგენტოს მონაცემებით, “ელექტრომოძრავი შემადგენლობის სარემონტო ქარხნის თბილისის ფილიალთან” თბილისის სატრანსპორტო კომპანიასთან არაერთი კონტრაქტი აქვს გაფორმებული, მათ შორის 2024 წელს 2 მილიონ ლარამდე ოდენობით, 2023 წელს 14 მილიონი ლარის ოდენობით, 2022 წელს კი 12 მილიონი ლარის ოდენობით.
საგამოძიებო უწყების ცნობით, საქმეს საფუძვლად თბილისის მერიის შიდა აუდიტისა და მონიტორინგის საქალაქო სამსახურიდან შემოსული მასალები დაედო. აუდიტმა ქარხნის საქმიანობაში შესაძლო დანაშაულის ნიშნები გამოკვეთა, რის შემდეგაც მასალები პროკურატურას გადაეგზავნა.
გამოძიება სისხლის სამართლის კოდექსის 182-ე მუხლით მიმდინარეობს, რაც სამსახურებრივი მდგომარეობის გამოყენებით დიდი ოდენობით ფულადი თანხის მართლსაწინააღმდეგო მითვისება-გაფლანგვას გულისხმობს.
უწყების ინფორმაციით, 3 თებერვალს, სასამართლოს განჩინების საფუძველზე, რამდენიმე მისამართზე ჩატარდა ჩხრეკა და სხვა საგამოძიებო მოქმედებები.
ამ დროისთვის სისხლის სამართლის საქმეზე გამოძიება გრძელდება. პროკურატურას ჯერჯერობით არ დაუკონკრეტებია მითვისებული თანხის ზუსტი ოდენობა და არც ის, არიან თუ არა საქმეში ბრალდებული პირები.(ბიემჯი)
კომენტარები