თბილისის სახელმწიფო უნივერსიტეტის პირველ კორპუსში აკადემიური საბჭოს სხდომა იწყება. პროფესორ-მასწავლებლებს აინტერესებთ დასაბუთება, რატომ გადაწყდა ორი დიდი უნივერსიტეტის გაერთიანება. ისინი დღეს ამ საკითზე თსუ-ს რექტორის, ჯაბა სამუშიას პოზიციას პირველად მოისმენენ.
პარალელურად, სასწავლებლის ეზოში იკრიბებიან სტუდენტებიც. ამის გამო მთელ პერიმეტზე უსაფრთხოების ზომებია გამკაცრებული.
პროფესორების ნაწილი ამბობს, რომ გადაწყვეტილება ნაჩქარევი იყო და საკითხი მსჯელობას და დაფიქრებას საჭიროებს. ამასთან, აკადემიური სფეროს წარმომადგენლები “ოცნების” მხრიდან არც კომერციულ ინტერესს გამორიცხავენ.
ვფიქრობ, ცოტა ნაჩქარევია ამ საკითხზე საუბარი, იმიტომ, რომ არავინ საქმის კურსში არ იყო აკადემიური პერსონალი, არც დამინისტრაცია, მემგონი და რავიცი, დასაფიქრებელია ძალიან. მხოლოდ გივი მიქანაძის განცხადებიდან გავიგე. რაღაც გადაწყვეტილებას რომ იღებ, პასუხისმგებლობაც უნდა აიღო და ასე, პირდაპირ არ შეიძლება. ამიტომ, რადგან საკმაოდ დიდი პასუხისმგებლობაა, საკაოდ კარგ განსჯას, დაფიქრებას, აწონ-დაწონვას მოითხოვს. არ არის გამორიხული, რომ კომერციული ინტერესიც შეიძლება იყოს, მაგრამ არ მინდა, ეს დავიჯერო, – ამბობს აკადემიური სფეროს წარმომადგენელი.
კიდევ ერთი ლექტორი ამბობს, რომ გადაწყვეტილება იმდენად ბუნდოვანია, რომ “კარგი მიზნის” დანახვა უჭირთ.
იმდენად არარაციონალური და მოულოდნელი გადაწყვეტილებაა თუ ჯერ დაგეგმილია, ვერ გეტყვით, აი, კონსტრუქციულ კომენტარს ვერ გავაკეთებ. აი, დღეს რომ შევედი და რაღაცნაირი სიტუაცია დამხვდა, უსაფრთხოება… მძიმე განცდით გამოვედი, ძალიან ვღელავ. მიზანი შეიძლება, ბევრი იყოს. ყოველ შემთხვევაში, იმდენად ბუნდოვანია, რომ კარგი მიზნის დანახვა აქ ძალიან რთულია. შესაბამისი მუშაობის გარეშე ასეთი სერიოზული საკითხის გადაწყვეტა, ცხადია, იქნება დამაზიანებელი, – ამბობს ერთ-ერთი ლექტორი.
კომენტარები