გათავისუფლებული ფოთელი მასწავლებლის საქმე – იგორ კეკელია მუქარის ფაქტებზე პროკურატურას მიმართავს

ქალაქ ფოთის ერთ-ერთი საჯარო სკოლიდან გათავისუფლებული პედაგოგის, იგორ კეკელიას განმარტებით, მისთვის უცნობი პირი მის მიმართ მუქარის შემცველი შეტყობინებების გაგზავნის ფაქტზე დააკავეს.

იგორ კეკელია აღნიშნავს, რომ დაკავებული პირი მას ჯანმრთელობის დაზიანებით ემუქრებოდა. გათავისუფლებული პედაგოგის თქმით, მსგავსი შეტყობინებები სხვა პირებისგანაც მიიღო, ვის შესახებაც პროკურატურას მიმართავს.

არც ვიცნობ საერთოდ ვინ არის. ჩემთვის უცნობი პიროვნება გამომეხმაურა სოციალურ ქსელ Messenger-ის საშუალებით, ისეთი შეტყობინებები გამომიგზავნა, რომ ჯანმრთელობის დაზიანებით მემუქრებოდა, ფეხების მომტვრევით, შეურაცხმყოფელი სიტყვებით, დედის გინებებით და ა.შ. და მისი განხორციელების საფუძვლიანი შიში გამიჩნდა. სხვა ადამიანებისგანაც არის ასეთი შეტყობინებები შემოსული ჩემს Messenger-სი და მე მათთან დაკავშირებითაც უნდა მივმართო პროკურატურას, რომ სამაგალითოდ დაისაჯოს ყველა ადამიანი,” – ამბობს იგორ კეკელია. 

ადვოკატი, თორნიკე მიგინეიშვილი იმედოვნებს, რომ იგორ კეკელიასთან დაკავშირებულ სისხლის სამართლის საქმეზე შსს-ს ისეთივე სწრაფი რეაგირება ექნება, როგორიც მუქარის ფაქტთან დაკავშირებით ჰქონდათ.

ბაკურიანის ტერიტორიაზე დააკავეს ერთ-ერთი პირი. ადამიანი, რომელმაც Messenger აპლიკაციის დახმარებით პედაგოგს გაუგზავნა შეტყობინება, რომელიც იყო მუქარის შემცველი, განსაკუთრებით კი ის ეხებოდა ჯანმრთელობის დაზიანებას. 

ჩვენ არ გვავიწყდება, რომ ერთ-ერთ სისხლის სამართლის საქმეზე, რომელიც ეხება პირადი ცხოვრების ამსახველი ვიდეო-კადრების გავრცელებას, ამ საკითხთან დაკავშირებით ჯერ გამოზიების მიმართ არსებობს კიდევ კითხვის ნიშნები, არსებობს გონივრული ვადა, რომელსაც ვაძლევთ ჩვენ გამოძიებას იმისთვის, რომ სხვადასხვა საგამოძიებო მოქმედებები ჩაატაროს და იმედი გვაქვს, რომ ამ საკითხზეც იქნება ისეთივე სწრაფი რეაგირება სამომავლოდ, როგორიც ამ შემთხვევაში იყო მუქარის ფაქტთან მიმართებით,” – ამბობს თორნიკე მიგინეიშვილი.  

ცნობისთვის, ფოთის ერთ-ერთი საჯარო სკოლის პედაგოგს პირადი ცხოვრების ამსახველი კადრები გაუვრცელეს – სკოლამ კი  54 წლის კაცი, მასწავლებელი სკოლიდან გაათავისუფლა.

მომხდარზე გამოძიება ფოთის რაიონულმა პროკურატურამ 1 თვის წინ დაიწყო. მოწმის სახით გამოკითხა დაზარალებული პედაგოგი.