ირანში მომუშავე ერთ-ერთმა ექიმმა რადიო თავისუფლების სპარსულ სამსახურს, რადიო ფარდას, განუცხადა, რომ უსაფრთხოების ძალები შტურმით შეიჭრნენ საავადმყოფოებში და იქ მოთავსებული დაჭრილი პროტესტანტები მოკლეს.
ექიმის თქმით, რომელიც სამხრეთ ირანში მდებარე საავადმყოფოში მუშაობს და ანონიმურად საუბრობდა შესაძლო რეპრესიების შიშით, უსაფრთხოების ძალებმა „ბოლო მოუღეს“ იმ დემონსტრანტებს, რომლებიც სამედიცინო დახმარების მისაღებად იყვნენ შეყვანილნი.
„ბევრი მოკლეს, ბევრი დააკავეს, ბევრი კი გაქცეულია. მდგომარეობა ძალიან მძიმეა“, – უთხრა ექიმმა მედიას.
უკვე მე-17 დღეა ირანში მასშტაბური ანტისამთავრობო დემონსტრაციები მიმდინარეობს. დემონსტრაციები ქვეყნის მასშტაბით 585 ადგილას – 186 ქალაქსა და 31-ვე პროვინციაში იმართება.
საპროტესტო მოძრაობის დაწყება მზარდ ინფლაციასა და ეროვნული ვალუტის კოლაფსს მოჰყვა.
ქვეყნის მასშტაბით კვლავ გათიშულია ინტერნეტი – გავრცელებული ცნობებით, მიმდინარეობს სტარლინკის სატელიტური ინტერნეტის ჩახშობაც.
რადიო თავისუფლება აღნიშნავს, რომ ექიმის მიერ გავრცელებული ინფორმაცია დამოუკიდებლად ვერ გადაამოწმა.
კომენტარები