“ვინც გავბედეთ და ხმა ამოვიღეთ, მას შემდეგ დაიწყო ჩვენს წინააღმდეგ ბრძოლა” – მაღაროელი გიორგი ნეფარიძე

ქუთაისის #2 პენიტენციურ დაწესებულებაში მყოფი მაღაროელი გიორგი ნეფარიძე წერილს ავრცელებს, სადაც ხელისუფლებას კორუფციასა და უსამართლობაში ადანაშაულებს.

ნეფარიძის თქმით, მას წინააღმდეგ პოლიტიკური მოტივით მიმდინარეობს დევნა.

“ვინც გავბედეთ და ხმა ამოვიღეთ, მას შემდეგ დაიწყო სუსმა და მთელმა სახელმწიფო სტრუქტურებმა ჩვენს წინააღმდეგ ბრძოლა… ჩემი ერთადერთი დანაშაული ჩემი ოჯახის, ჩემი სოფლის, ჩემი ქალაქის და ჩემი ქვეყნის სიყვარულია!“ – წერს ნეფარიძე.

ნეფარიძის განცხადებით, 2017 წლიდან მოყოლებული, მას 82 სასამართლო პროცესი ჩაუტარდა, ხოლო ამჯერად 225-ე მუხლით ედავებიან და 6-დან 9 წლამდე პატიმრობა ემუქრება.

შეგახსენებთ, რომ 29 აპრილს, ჭიათურაში ჩატარებული სპეცოპერაციის დროს, პოლიციამ ოთხი მაღაროელი – გიორგი ნეფარიძე, მერაბ სარალიძე, თენგიზ გველესიანი და აჩიკო ჭუმბურიძე დააკავა. დაკავებულებს შუქრუთის მაღაროს დირექტორისთვის ფიზიკური დაზიანების მიყენებას ედავებიან.