დღეს საქართველოს კოვიდ-ცენტრებში 224 პაციენტი მკურნალობს. ამის შესახებ ჟურნალისტებს თბილისის ინფექციური საავადმყოფოს სამედიცინო დირექტორმა, მარინა ეზუგბაიამ განუცხადა. მან ასევე კორონავირუსით დაავადებული ახალი პაციენტების შესახებ ისაუბრა და აღნიშნა, რომ ყველა მათგანის ინფიცირების წყარო ცნობილია.
„ახალი 8 დადასტურებული შემთხვევიდან 1 არის ბოლნისის წყარო. დანარჩენი 7 არის საკარანტინო ზონაში ჩატარებული ტესტირების შედეგად დადასტურებული. ამ 8 ახალი შემთხვევიდან 2 შემთხვევა არის კლინიკურად მძიმე გამოხატული სურათით. დღეს გაფართოებული კვლევები ჩატარდება, შეფასდება ეს ყველაფერი და საბოლოო მონაცემებს შემდგომში ვიტყვით. ასაკობრივი სპექტრი განსხვავებულია. არიან მაღალი ასაკის პირებიც და საშუალო ასაკის პირებიც“, – განაცხადა ეზუგბაიამ.
მისივე თქმით, ინფექციურ საავადმყოფოში ამ ეტაპზე კორონავირუსით ინფიცირებული 36 პაციენტი მკურნალობს, სპეციალისტები ასევე 3 შესაძლო შემთხვევას აკვირდებიან.
საქართველოში კორონავირუსი 721 ადამიანს დაუდასტურდა, აქედან 485 უკვე გამოჯანმრთელდა, 12 პაციენტი კი გარდაიცვალა.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.
კომენტარები