ბატონი კობახიძის პოზიცია, რომელიც თავის თანამემამულეებს, რომლებიც სამხრეთ ოსეთის მშვიდობიან მოსახლეობას ებრძოდნენ, გმირებად, ხოლო ოსებს, რომლებიც თავიანთ მიწას იცავდნენ, მკვლელებად თვლის, სრულად შეესაბამება საქართველოში არსებული რეალური მდგომარეობის დამახინჯებულ გაგებას, – ამის შესახებ განცხადებას ოკუპირებული ცხინვალის ე.წ. საგარეო საქმეთა სამინისტრო ავრცელებს.
„როგორც მოსალოდნელი იყო, საქართველოში, მმართველი „ქართული ოცნების“ საპატიო თავმჯდომარის ბიძინა ივანიშვილის განცხადებებს, 2008 წლის აგვისტოში სამხრეთ ოსეთის რესპუბლიკის წინააღმდეგ განხორციელებული შეიარაღებული აგრესიის გამო, ოსი ხალხისთვის ბოდიშის მოხდის აუცილებლობის შესახებ, პრემიერ-მინისტრ, ირაკლი კობახიძის განცხადება მოჰყვა, რომელმაც აღნიშნა, რომ ამის გაკეთებას არავინ აპირებს. ამის გამო უნდა აღინიშნოს, რომ ბატონი კობახიძის პოზიცია, რომელიც თავის თანამემამულეებს, რომლებიც სამხრეთ ოსეთის მშვიდობიან მოსახლეობას ებრძოდნენ, გმირებად, ხოლო ოსებს, რომლებიც თავიანთ მიწას იცავდნენ, მკვლელებად თვლის, სრულად შეესაბამება საქართველოში არსებული რეალური მდგომარეობის დამახინჯებულ გაგებას“, – ნათქვამია ოკუპირებული ცხინვალის ე.წ. საგარეო უწყების განცხადებაში.
ე.წ. საგარეო უწყების განცხადებით, საქართველოში საპარლამენტო არჩევნების წინა პერიოდში „ქართულ-ოსური ურთიერთობების თემა, ასე თუ ისე, შიდაპოლიტიკურ წინასაარჩევნო ბრძოლაში იქნება გამოყენებული“ და ე.წ. უწყება თბილისს მოუწოდებს, რომ „რეალური ნაბიჯი გადადგას, რომელიც კეთილ ზრახვებს დაადასტურებს“ და ძალის გამოუყენებლობის შესახებ იურიდიულად სავალდებულო დოკუმენტებს ხელი მოაწეროს.
განცხადებაში აღნიშნულია, რომ ოკუპირებული ცხინვალის განვითარების პოლიტიკური ვექტორი „ისტორიულად გაცნობიერებული არჩევანია, რომელიც რუსეთის ფედერაციასთან მოკავშირული და ინტეგრაციული კავშირების ყოვლისმომცველი გაძლიერების აუცილებლობით არის განპირობებული, რომელიც რეგიონში მშვიდობისა და უსაფრთხოების გარანტია და რომლის ტერიტორიაზე გაყოფილი ოსი ხალხის უმრავლესობა ცხოვრობს“.
,,ინტერპრესნიუსი”
კომენტარები