ოკუპირებული აფხაზეთის ე.წ. პრეზიდენტის ავტოკოლონა ავტოავარიაში მოყვა. შემთხვევა 12 მარტს მოხდა. აფხაზური პორტალის ცნობით, შემთხვევის დროს, ასლან ბჟანია ერთ-ერთ მანქანაში იმყოფებოდა. ვარაუდობენ, რომ ის უვნებელი გადარჩა.
„იმის გათვალისწინებით, რომ კანონი არ არის დაწერილი საპრეზიდენტო ავტოკოლონისთვის და მისი დანახვისთანავე ყველა უნდა გადავიდეს გზის პირას, პრეზიდენტის დაცვის მანქანა გამვლელ მანქანას შეეჯახა. გასაკვირია, რომ ორი ზოლი თავისუფალი იყო, მაგრამ პრეზიდენტის მანქანამ მაინც იმდენი მოახერხა, ერთადერთ მანქანას დაჯახებოდა, რომელიც იმ მომენტში გზატკეცილზე იყო“, – ნათქვამია ინფორმაციაში.
ტელეგრამის არხზე გამოქვეყნდა ვიდეო, სადაც ნათქვამია, რომ დაზიანებული მანქანა ე.წ. აფხაზეთის მინისტრთა კაბინეტის შენობის წინ კვლავ გვიან საღამომდე იდგა.
ოკუპირებული აფხაზეთის ე.წ. ოფიციალური სტრუქტურები ამ ინფორმაციაზე კომენტარს არ აკეთებენ.
კომენტარები