მოვითხოვთ, ცხედარი სასწრაფოდ გადაეცეს მის ოჯახს – ნავალნის პრესმდივანი

რუსი ოპოზიციონერის, ალექსეი ნავალნის პრესმდივანი, კირა იარმიშის განცხადებით, პოლიტიკოსის ცხედარი ოჯახს სასწრაფოდ უნდა გადაეცეს.

ამასთან, პრესმდივანმა ალექსეი ნავალნის სიკვდილი დაადასტურა.

„ალექსეი ნავალნი მოკლეს. ალექსეის დედისთვის გადაცემული ოფიციალური შეტყობინების თანახმად, ის 16 თებერვალს, ადგილობრივი დროით, 14:17 საათზე დაიღუპა. კოლონიის თანამშრომელმა თქვა, რომ ნავალნის ცხედარი ახლა სალეხარდშია. ახლა მასთან „გამოძიებას“ ატარებენ.

მოვითხოვთ, ალექსეი ნავალნის ცხედარი სასწრაფოდ გადასცეს მის ოჯახს“, – განაცხადა ნავალნის პრესსპიკერმა.

როგორც იარმიშმა, ნავალნის ადვოკატი და დედა სალეხარდის მორგში მივიდნენ, თუმცა მორგი დახურული აღმოჩნდა. მისი თქმით, ადვოკატმა მორგის კარზე მითითებულ ტელეფონის ნომერზე დარეკა, სადაც უთხრეს, რომ მათ ნავალნის ცხედარი არ ჰქონდათ.

„სალეხარდის მორგში ალექსის ადვოკატი და დედა მივიდნენ. ის დახურულია, მიუხედავად კოლონიის დარწმუნებისა, რომ მუშაობს და ნავალნის ცხედარი იქ არის. კარზე მითითებულ ტელეფონის ნომერზე დარეკა ადვოკატმა. მას უთხრეს, რომ ის მეშვიდე იყო, ვინც დღეს დარეკა. მორგში ალექსეის ცხედარი არ აქვთ“, – აცხადებს ნავალნის პრესმდივანი.

ნავალნის თანამოაზრეების ცნობით, სალეხარდის საგამოძიებო კომიტეტი ამტკიცებს, რომ მათ ნავალნის გარდაცვალების მიზეზი ვერ დაადგინეს და ცხედარს ჩატარდა „განმეორებითი ჰისტოლოგიური გამოკვლევა“ ჩაუტარდა.

ნავალნის პრესმდივნის ცნობით, ექსპერტიზის შედეგები „სავარაუდოდ ხელმისაწვდომი მომავალ კვირას იქნება“.

„აშკარაა, რომ იტყუებიან და ყველაფერს აკეთებენ იმისთვის, რომ ცხედარი არ დატოვონ“, – წერს იგი.

15 თებერვალს რუსეთის სასჯელაღსრულების ფედერალური სამსახურის („ფსინ“) განცხადებით, ციხეში ოპოზიციონერი ალექსეი ნავალნი დაიღუპა.

ალექსეი ნავალნი რუსი ოპოზიციონერი პოლიტიკოსი იყო. იგი 2000-იანი წლების ბოლოდან მონაწილეობდა პოლიტიკურ ცხოვრებაში და ჰქონდა სხვადასხვა ანტიკორუფციული პროექტი. იყო ხელისუფლების საწინააღმდეგო აქციების ორგანიზატორი და მონაწილეც.

ნავალნისა და მის გუნდს გამოქვეყნებული აქვთ არაერთი გამოძიება რუსი ჩინოვნიკების კორუფციაზე, მათ შორის, ვლადიმერ პუტინისა და დიმიტრი მედვედევის შესახებ.

2018 წელს ნავალნის საპრეზიდენტო არჩევნებში სურდა მონაწილეობა, თუმცა რუსეთის ცესკომ კანდიდატად არ დაარეგისტრირა.

2020 წელს მისი მკვლელობა მოწმავლით სცადეს, რის შემდეგაც ნავალნი გერმანიაში მკურნალობდა. მასზე აღძრული სისხლის სამართლის საქმეების მიუხედავად, ნავალნი რუსეთში 2021 წლის იანვარში დაბრუნდა, ის აეროპორტშივე დააპატიმრეს. მალევე, ნავალნის „კორუფციასთან ბრძოლის ფონდი“ და მასთან დაკავშირებული სტრუქტურები ხელისუფლებამ უკანონოდ გამოაცხადა.

ციხეში ყოფნისას ნავალნი დასჯის მიზნით მუდმივად გადაჰყავთად საჯარიმო იზოლატორში. 2023 წლის ბოლოს კი დედაქალაქისგან ასეულობით კილომეტრში, რუსეთის უკიდურეს ჩრდილოეთში არსებულ კოლონიაში გადაიყვანეს.