“ლაზარეს თავისუფლებისთვის!” – დღეს, 20:00 საათზე 21 წლის დაკავებული აქტივისტის მხარდასაჭერად პარლამენტთან აქცია გაიმართება.
შეკრების ორგანიზატორი პარტია “ევროპული საქართველოა”.
“დღევანდელი აქცია უნდა გამართულიყო კანცელარიასთან, მაგრამ ხელისუფლებამ გადაწყვიტა, რომ სკვერი მოაწყოს. დაუგეგმავად, მაშინ, როცა არანაირი ტენდერი გამოცხადებული არაა ასე კონკრეტულად, რომ კანცელარიის წინ სკვერი უნდა გაკეთებულიყო და დაგეგმილი სამუშაოები უნდა განხორციელებულიყო, შესაბამისად, მოგვიწია აქციის პარლამენტის წინ გადმოტანა.
ყველა ფორმალური ვალდებულება გავლილია, წერილობით ვაცნობეთ პოლიციასაც, მერიასაც, მაგრამ სამწუხაროდ, კიდევ 1 საათით გადაიდო სცენის აწყობის სამუშაოები, რადგან პოლიცია და სახელმწიფო დაცვის სპეციალური სამსახური, სცენის აწყობის შესახებ ინფორმაციას, მაინც ვიღაცას ტელეფონით უთანხმებენ”, – თქვა “ევროპული საქართველოს” პოლიტიკური საბჭოს წევრმა, ბესიკ დონაძემ.
31 მარტს თბილისის საქალაქო სასამართლომ მარტის აქციებზე დაკავებულ ლაზარე გრიგორიადისს აღკვეთი ღონისძიების სახით პატიმრობა შეუფარდა.
შსს-ს მტკიცებით, მან 7 მარტის საპროტესტო აქციაზე ორჯერ ისროლა ე.წ მოლოტოვის კოქტეილი პოლიციელების მიმართ, რის შედეგადაც რამდენიმე პოლიციელი დაშავდა. მას ასევე ბრალი ედება პოლიციის კუთვნილი მანქანის დაწვაში.
საქმეზე გამოძიება სსკ-ის 353-ე პრიმა და 187-ე მუხლებით მიმდინარეობს. ბრალის დამტკიცების შემთხვევაში, დაკავებულს 7-დან 11 წლამდე პატიმრობა ემუქრება
კომენტარები