რუსეთმა ოკუპირებული აფხაზეთის გავლით თურქეთში ტვირთების გადაზიდვა დაიწყო. 30 მარტს ე.წ. “აფხაზეთის რკინიგზა” წერდა, რომ 23 მარტს დროებით ოკუპირებულ აფხაზეთში საკონტეინერო მატარებელი ჩავიდა.
“მატარებელი სოხუმის რკინიგზის სადგურზე მიიღეს, მსგავსი მოვლენა აფხაზეთის რკინიგზის ისტორიაში პირველად ხდება. აფხაზეთში ჩავიდა მატარებელი 62 კონტეინერით, რომელშიც 2700 ტონა ტვირთი იყო.”,- წერია 30 მარტს გამოქვეყნებულ მასალაში.
ცნობილი გახდა, რომ სოხუმში „პირველი საკონტეინერო მატარებელი“ ჩავიდა. მედია ვარაუდობდა, რომ ეს იყო საერთაშორისო სანქციების გვერდის ავლის რუსეთის კიდევ ერთი სქემა.
მედიის ინფორმაციით, ახლა ტრანზიტის ფაქტი დაადასტურა ოკუპირებული აფხაზეთის ე.წ. სახელმწიფო საბაჟო კომიტეტის თავმჯდომარის პირველმა მოადგილემ ალიას ლაბახუამ.
„ცოტა ხნის წინ ჩამოვიდა მატარებელი 62 კონტეინერით. ეს იყო საქონლის ტრანზიტი რუსეთის ფედერაციიდან თურქეთში. მატარებელი დაუბრკოლებლად შემოვიდა, საბაჟო სამსახურის მხრიდან არანაირი შეფერხება არ ყოფილა. ეს არ არის პირველი მერცხალი, იყო სხვა ტრანზიტები“ , – განაცხადა აფხაზეთის ე.წ. სახელმწიფო საბაჟო კომიტეტის თავმჯდომარის პირველმა მოადგილემ.
კომენტარები