“არსებობს კითხვის ნიშნები ფსიქიკურ დაავაებასთან დაკავშირებით, დანიშნულია ფსიქიატრიული ექსპერტიზა”- ამის შესახებ პროკურორმა ალინა კუკავამ „ამბასადორში“ ხანძრის გაჩენის ფაქტზე დაკავებული ანზორ ლომიძის სასამართლო პროცესის შემდეგ განაცხადა.
სისხლის სამართლის საქმეზე გამოძიება გრძელდება. შუამდგომლობის დასაბუთების დროს, ბრალდების მხარე შეეხო აღნიშნულ გარემოებას მას შემდეგ რაც, საკითხი დაცვის მხარემ წამოჭრა.
„ერთი რამ შემიძლია გითხრათ – ზოგადად, როცა ფსიქიატრიული ექსპერტიზის დასკვნით დგინდება, რომ პირი დანაშაულის ჩადენის დროს იყო შეურაცხადი, ამ დროს, ჩვენი კანონმდებლობით სამართლებრივი დევნა წყდება, თუმცა სასამართლოს გადაწყვეტილებით, პირი იძულებითი ფსიქიატრიული მკურნალობის ჩატარების მიზნით, კონკრეტული ვადით თავსდება შესაბამის დაწესებულებაში” – აღნიშნა ალინა კუკავამ.
სასამართლო პროცესზე ბრალდების მხარის წარმომადგენელმა თქვა, რომ ბრალდებულის დედის თქმით, 28 წლის კაცს ფსიქიკური ჯანმრთელობის პრობლემა ჰქონდა, თუმცა მედიკამენტებს არ იღებდა.
„მან არ მიიღო მედიკამენტი. დატოვა საცხოვრებელი სახლი, რის გამოც რამდენიმე დღის განმავლობაში უცნობი იყო მისი ადგილსამყოფელი“, – განაცხადა ალინა კუკავამ სასმართლო პროცესზე. თბილისის საქალაქო სასამართლომ დაკავებულ ანზორ ლომიძეს აღკვეთის ღონისძიების სახით პატიმრობა შეუფარდა
კომენტარები