შეხვედრა რესპუბლიკურ საავადმყოფოში – მედპერსონალის ნაწილმა მოლაპარაკებები პროტესტის ნიშნად დატოვა

რესპუბლიკურ კლინიკაში ჯანდაცვის სამინისტროს წარმომადგენლებთან შეხვედრა უკვე 2 საათია გრძელდება. როგორც ცნობილია, მოლაპარაკებებს ესწრებიან ჯანდაცვის მინისტრის მოადგილეები: ილია ღუდუშაური და თამარ გაბუნია, კლინიკის ხელმძღვანელი – ზაზა ავალიანი და კლინიკის მედპერსონალი.

კლინიკის თანამშრომლების ნაწილმა შეხვედრა პროტესტის ნიშნად დატოვა. მათი თქმით, ჯანდაცვის სამინისტრო მოთხოვნების შესრულებას და ავალიანის თანამდებობიდან გადაყენებას არ აპირებს.

“აზრი არ აქვს. ჩვენი მოთხოვნაა, რომ შეგვიცვალეთ დირექტორი მოვალეობის შემსრულებლად რომ ჰყავთ გამოშვებული, ამ ადამიანს შეუწყვიტონ ეს სამივლინებო, ჩვენ არ გვინდა-თქო ამას ვლაპარაკობთ, მაგრამ პასუხი გვაქვს იგივე, რა აზრი აქვს რას უნდა მოვუსმინოთ იმის იქით. ჯანდაცვის სამინისტროს აქვს იგივე პოზიცია, რომ ეს არის ჩვენი დირექტორი და მორჩა”, – თქვა რესპუბლიკური კლინიკის ერთ-ერთმა თანამშრომელმა.

თავად ჯანდაცვის სამინისტროს წარმომადგენლებს მედიასთან კომენტარი ჯერჯერობით არ გაუკეთებიათ.

შეხვედრის პარალელურად რესპუბლიკურ კლინიკაში პროტესტი გრძელდება. კლინიკის თანამშრომლების მოთხოვნები უცვლელია:

• სახელმწიფო დაუბრუნდეს კლინიკის რეაბილიტაციის პირვანდელ პროექტს, რომელიც ითვალისწინებდა რეკონსტრუქციის პარალელურად კლინიკის მუშაობის ჩვეულ რეჟიმში გაგრძელებას;
• გადადგეს საავადმყოფოს დირექტორი ზაზა ავალიანი;
• მედპერსონალს შეხვდეს პრემიერმინისტრი

,,მთავარი არხი”