ნავთობის და გაზის ფასები ეცემა

საერთაშორისო ენერგეტიკულ ბირჟაზე დაღმასვლის ტენდენცია ფიქსირდება – ბარელი Brent-ის ფასი დღევანდელ სავაჭრო სესიაზე დამატებით 1%-ით დაეცა და ამჟამად მისი ღირებულება 73 დოლარს შეადგენს. ერთკვირიან ჭრილში ვარდნის მაჩვენებელი 6%-ს აჭარბებს, წინა წლის ანალოგიურ პერიოდთან შედარებით კი ნავთობი 33%-ითაა გაიაფებული.

დაღმასვლის ტენდენცია ფიქსირდება WTI Crude-თან მიმართებითაც, მისი ფასი ბარელზე 67 დოლარს შეადგენს, ვარდნის მაჩვენებელი კი ერთ კვირაში 6.5%-ია; ხოლო ერთწლიან პერიოდში WTI თითქმის 37%-ითაა გაიაფებული.

მკვეთრად მცირდება რუსული ნავთობის ფასიც, ბარელი Urals-ის ღირებულება ბირჟაზე 48 დოლარს შეადგენს, მისი ფასი კი ერთ კვირაში 16.5%-ითაა შემცირებული. რაც შეეხება ერთწლიან პერიოდს, საერთაშორისო ბირჟაზე რუსული ნავთობი 50%-ითაა გაიაფებული.

დაღმასვლის ტენდენცია ფიქსირდება ბუნებრივ აირთან მიმართებითაც. ევროპული ბენჩმარკის, Dutch TTF-ის ღირებულება მეგავატ-საათზე ერთ კვირაში 11%-ითაა შემცირებული და ამჟამად 39 ევროს შეადგენს.

აგრეთვე მკვეთრად დაეცა ბრიტანული გაზის ფასიც, რომელიც ერთ კვირაში 25%-ით, ხოლო ერთ წელიწადში 60%-ითაა გაიაფებული.

საერთაშორისო ბირჟებზე არსებული დაღმასვლის ტენდენცია მსოფლიოს მასშტაბით მაკროეკონომიკური რისკების ზრდითაა განპირობებული, რასაც, თავის მხრივ, მსხვილი ბანკების და საფინანსო ინსტიტუტების გაკოტრება იწვევს.