,, როგორ აპირებთ ამ სირცხვილის ტარებას?” – ნათია მეზვრიშვილი

პარტია ,,საქართველოსთვის” წევრი, ნათია მეზვრიშვილი:

,,ჩვენი ერთადერთი მტერი რუსეთია. ოცნებამ მტრად მეგობრები გამოგვიცხადა. მაინტერესებს სად არიან ის მოქმედი თანამდებობის პირები, ვინც დასავლეთის დახმარებით აშშ-სა და ევროპაში განათლება მიიღო, ვის პროფესიულ განვითარებაშიც დასავლეთმა ათასობით ფული ჩადო, ვინც შესანიშნავად იცის, რომ ქვეყნისთვის უმნიშვნელოვანესი რეფორმები დასავლეთის დახმარების გარეშე უბრალოდ შეუძლებელი იქნებოდა. ახლა არის მომენტი, როცა მხარე უნდა აირჩიო. ჩუმად ვერ იქნები. ხვალინდელ, უკეთეს საქართველოში თითოეული ჩვენგანის ადგილი იმის მიხედვით განისაზღვრება, როგორია ჩვენი პოზიცია დღეს.

2007 წლიდან 2021 წლამდე საჯარო სამსახურში გავატარე. ამერიკელების და ევროპელების დახმარებით გახდა შესაძლებელი: არასრულწლოვანთა მართლმსაჯულების სისტემის რეფორმა, რამაც უამრავ არასრულწლოვანს მისცა ნასამართლობის გარეშე ცხოვრებისა და რესოციალიზაციის შესაძლებლობა; ნაფიც მსაჯულთა ინსტიტუტის დანერგვა, რამაც სასამართლოს მიმართ ნდობის არარსებობის პირობებში, მნიშვნელოვანი როლი შეასრულა მართლმსაჯულების სისტემისადმი ნდობის მეტნაკლებად გაზრდაში; წამებისა და არასათანადო მოპყრობის წინააღმდეგ ბრძოლა, რამაც დაკავების ადგილებში შექმნა ღირსეული პირობები და ადამიანებს გაუჩინა დაცულობის მეტი განცდა; ელექტრონული სამაჯურების დანერგვა, რამაც შესაძლებელი გახადა ოჯახში და ქალთა მიმართ ძალადობის წინააღმდეგ ქმედითი ბრძოლა. რომ არა დასავლეთი, შეუძლებელი იქნებოდა პოლიციის, პროკურატურის, სასამართლოს რეფორმები, უწყებების ტექნიკური აღჭურვა და თანამედროვე სისტემებად გარდაქმნა. და ეს მხოლოდ ძალიან მცირედი ჩამონათვალია.

ამ საქმეში ბევრი ადამიანი მახსოვს ჩემთან ერთად და რატომ ხართ დღეს ჩუმად? თუ თვლით, რომ მტერი გვეხმარებოდა? ან ამ სიჩუმის პირობებში, როგორ აპირებთ ხვალ კონფერენციებზე ჯდომას და დონორული დახმარების მიღებას ისე, თითქოს არაფერი მომხდარა. მოგიწოდებთ, რომ ხმა ამოიღოთ, მაღალი, პოლიტიკური თანამდებობის პირებმა მაინც. უბრალოდ დღევანდელი სიჩუმით გამოწვეული სირცხვილის გრძნობა არ მოგასვენებთ.

აღარაფერს ვამბობ იმ ხალხზე პარლამენტიდან, რომლებიც პარტიონრებთან პირად საუბრებში თავს პრო-დასავლელებად ასაღებთ, ხელს ივანიშვილისკენ იშვერთ და ამ დრომდე არათუ ხმა არ ამოგიღიათ, აუღელვებლად დაუჭირეთ მხარი კანონპროექტებს. როგორ აპირებთ ამ სირცხვილის ტარებას?”