„ეს კავკასიური ცარცის წრე არაა, ეს ორმოა“ – მერაბ მეტრეველი

განა იმიტომ რომ ვინმეს რაიმე იარლიყის ეშინია, ან ვინმე ამის გამო გაჩერდება, ან იმიტომ რომ ჩვენი კანონი უფრო ცუდია, სხვა ქვეყნების კანონზე. არა. ეს იქნება კიდევ ერთი ნაბიჯი უკან იმ ორმოში, რასაც საბჭოთა წარსული ქვია, რადგან აქ მნიშვნელობა იმას კი არ აქვს, ვის აქვს კიდევ ეს კანონი, რომ ამერიკასაც აქვს, ან ამერიკული კანონი უფრო მკაცრია, თუ ჩვენი. აქ მთავარი ამ კანონის მიღების კონტექსტი და მიზანია .

ამერიკამ ეს კანონი მიიღო 1939 წელს, როდესაც ნაციზმი საფრთხე იზრდებოდა. ჩვენ კი ვიღებთ დღეს, 2023 წელს და ვიღებთ არა ნაციზმის საფრთხის, ან ახალი რუსული რაშიზმის საფრთხის წინააღმდეგ, არამედ ვიღებთ რუსეთის კვალდაკვალ და რუსეთის მსგავსად ქვეყანაში დასავლური გავლენების შესამცირებლად. ამას კანონის ავტორები არც მალავენ. ჩვენ ამ კანონის მიღებით უკვე ოფიციალურ დონეზე მთავარ საფრღხედ დასავლეთს ვაცხადებთ. ესა აქ მთავარი პრობლემა.

ამ კანონის მიღების მიზანი ჩვენს მთავრობას აყენებს პუტინის რეჟიმის გვერდით, რადგან ამ კანონის მიღებით, “ოცნება” ოფიციალურად მტრად და საფრთხედ აცხადებს დასავლეთს, ამიტომ არანაირი მნიშვნელობა არ აქვს კანონის შინაარსის განხილვას.

ამ კანონით და მისი ბოლო დროს გადადგმული ნაბიჯებით “ოცნება” გვაბრუნებს უკან საბჭოთა ორმოში. ამ ორმოდან ამოსვლის ერთადერთი შანსი ჩვენთვის დასავლეთთან პარტნიორობა იყო. სწორედ მათ ხელს ვართ ეს 30 წელი ჩაჭიდებული და ასე ვცდილობთ ამობობღებას. დასავლეთი ზევით გვექაჩება, რუსეთი ქვევით.

ეს კავკასიური ცარცის წრე არაა, ეს ორმოა, საბჭოთა ორმო. შესაბამისად აქ ხელის გაშვება გადარჩენას არ ნიშნავს. აქ ხელის გაშვება ჭაობში ჩარჩენას ნიშნავს. ამიტომ იმ ხელს კი არ უნდა უკბინო, რომელიც ზევით გექაჩება, არამედ მაგრად უნდა ჩაეაჭიდო.

ეს კანონი კი საშველად გამოწვდილ ხელზე კბენაა სწორედ.“