ყოფილი პარლამენტარი, დავით ზურაბიშვილი:
„ნაციონალური მოძრაობის მმართველობის პერიოდის ერთ-ერთი დამახასიათებელი თავისებურება არის ის, რომ ყველაფერი დადებითი რაც იმ დროს მოხდა, პრაქტიკულად განუყოფელია იმ ყველაფერ უარყოფითისგან, რაც მაშინ ხდებოდა. მეტიც, იმ დადებითის ძალიან დიდი წილი სწორედ იმ უარყოფითის ხარჯზე გაკეთდა.
კერძოდ, ქურდების და კრიმინალის ალაგმვა, პატრულის შემოღება, საბაჟოს და საგადასახადო სისტემების ეფექტიანობის მკვეთრი ზრდა, ტოტალური კორუფციის დამარცხება, ენერგოკრიზისის დაძლევა და ა.შ და ა.შ. მიღწევები განხორციელდა პოლიტიკური ძალაუფლების ვიწრო წრეში კონცენტრაციის, ძალოვანი სტრუქტურების პოლიტიზირებისა და ქვეყნის მართვის მთავარ ინსტრუმენტად გამოყენების, სასამართლოსა და ბიზნესზე სრული კონტროლის, საზოგადოების დაშინებისა და დაშანტაჟების მეშვეობით. სხვანაირად რომ ვთქვა, ქვეყანაში განხორციელდა სახელმწიფოს მოდერნიზაცია დემოკრატიისა და თავისუფლების ხარჯზე.
ეს განუყოფელობა ჰქმნის სწორედ იმ პერიოდის პოლარიზებულ აღქმას. ვიღაცისთვის ზემორე პლუსები იმდენად მნიშვნელოვანია, რომ ზემორე მინუსები მათ ფონზე ფერმკრთალდება, ხოლო ვიღაცისთვის სწორედ ეს მინუსებია ხელისუფლების შეფასებისთვის განმსაზღვრელი და ჩამოთვლილი პლუსები მათ გამართლებად არანაირად არ მიაჩნია (კომენტარებში რომ არ იმკითხაოთ, აქვე ვიტყვი, რომ მეც ასე ვაფასებ). ისეთებიც არიან, მარტო პლუსებს ან მარტო მინუსებს რომ ხედავენ და საწინააღმდეგოს არც აღიარებენ.
თუმცა, ასეა თუ ისე, ამ არადემოკრატიული მოდერნიზაციის პროცესში მიხეილ სააკაშვილთან ერთად მთავარი ფიგურები იყვნენ ვანო მერაბიშვილი, ზურაბ ადეიშვილი და დავით კეზერაშვილი. ისინი იყვნენ არა მხოლოდ სააკაშვილის დავალებების შემსრულებლები, არამედ პრეზიდენტთან ერთად მთელი მმართველობითი სისტემის შემქმნელები და საკვანძო ფიგურები. სხვათა შორის ბიძინა ივანიშვილსაც მნიშვნელოვანი წვლილი აქვს ამ მოდერნიზაციაში შეტანილი, რამდენადაც ის იყო სახელისუფლო გუნდის მთავარი ფინანსური დონორი და პირველი ორი წელი, სანამ ბიუჯეტი გაიზრდებოდა, საკუთარი ჯიბიდან უხდიდა ხელფასს მთელ სახელმწიფო ბიუროკრატიას.
აქედან გამომდინარე, მე, რბილად რომ ვთქვა, ალოგიკურად მეჩვენება ის, რომ ნაცმოძრაობის ამა თუ იმ ფორმით მომხრეს, რომელიც სააკაშვილის მმართველობას მიიჩნევს ამ ქვეყნის ისტორიაში საუკეთესო პერიოდად, ისე უნდა ნაცმოძრაობა ხელისუფლებაში, რომ არ უნდა არც მერაბიშვილი, არც ადეიშვილი, არც კეზერაშვილი და ზოგს კიდევ სააკაშვილიც არ უნდა. ანუ უნდათ იგივე სისტემა, ოღონდ ამ სისტემის შემქმნელების, სულისჩამდგმელების და მმართველების გარეშე.
ჰოდა, აი, რანაირად?“
კომენტარები