ქარელის მერიამ მოსაცდელი ააშენა სოფელში, სადაც ტრანსპორტი წლებია აღარ დადის

ქარელის მუნიციპალიტეტის სოფელ ღოღეთში მერიამ სოფლის მცხოვრებლებს მოსაცდელი აუშენა, რაშიც 10 000 ლარი დახარჯა – ინფორმაციას “mozaikanews” ავრცელებს.

გამოცემის ცნობით, სოფელში, რომელშიც მუდმივ მხოლოდ 25 კომლი ცხოვრობს, საზოგადოებრივი ტრანსპორტი წლებია აღარ დადის.

“სოფელ ღოღეთში ტრანსპორტი კომუნისტების პერიოდიდან აღარ დადის, რადგან მოსახლეობის რაოდენობა არის მცირე”, – ამბობს გია კილასონია, მერის წარმომადგენელი ადმინისტრაციულ ერთეულში.

მისივე თქმით, მერიამ მოსაცდელი საბავშვო ბაღის აღსაზრდელებისა და სკოლის მოსწავლეებისთვის ააშენა.

“მართალია, საზოგადოებრივი ტრანსპორტი არ მოძრაობს, თუმცა საბავშო ბაღის და სკოლის ბაშვები ღოღეთიდან ფცაში დადიან და ეს ბავშვები ამ მოსაცდელით სარგებლობენ”, – თქვა კილასონიამ.

შეგახსენებთ, რომ რამდენიმე თვის წინ, ქარელის მერიამ სოფელ კოდავარდის უბანში, სადაც საზოგადოებრივი ტრანსპორტი არ დადის, 2 მოსაცდელი ააშენა და ბიუჯეტიდან 20 000 ლარი დახარჯა.