ლევან ჯავახიშვილი
„ალიას“ ესაუბრება ადვოკატი, ვალერი გელბახიანი.
– ამერიკელი სენატორების განცხადებების საპასუხოდ „ქართული ოცნების“ დეპუტატების განცხადებებზე რას იტყვით? ირაკლი ზარქუამ სენატორ ჯინ შაჰინს ჩათლახი უწოდა, მერე კი ვითომ იმართლა თავი, მაგრამ მაგის გარეშეც ბევრი უხამსი კომენტარები გვახსოვს. დარწმუნებული ვარ, „ოცნების“ ლიდერთაგან არც ერთმა არ იცის, რომ ჯინ შაჰინი იყო პირველი ამერიკელი პოლიტიკოსი, რომელმაც 2011 წლის ოქტომბერში, მიხეილ სააკაშვილსა და „ნაცმოძრაობას“ ღიად, მედიით მოუწოდა, არჩევნების გზით დაეთმოთ ხელისუფლება და მშვიდობიანი გზით გადაეცათ ოპოზიციისთვის. ამ თავხედი არსებების გასალანძღი გახდა ის ხალხი, რომელთაგანაც რომელიმე ახლო მომავალში შესაძლოა, ამერიკის პრეზიდენტი, მსოფლიოს #1 ქვეყნის მმართველი გახდეს?!
– კარგი, რა. ამათ რა იციან საერთოდ? ჯინ შაჰინმა რიდის რა თქვა ეგ არა, მაგრამ ბიძინამ სად და რა თქვა, მარტო ეგ იციან ზეპირად.შემთხვევითი, მონური ერთგულებით შერჩეული ხალხია, რომლებიც 2011-2012 წლებში ბუჩქებში იმალებოდნენ „ნაციონალების“ შიშით.
– ევროკომისარი, ოლივერ ვარჰეი იყო ჩამოსული თბილისში და ხელისუფლების მიმართ საკმაოდ ლოიალური განცხადებები გააკეთა. არადა, ადრე ამერიკის და ევროკავშირის განცხადებები ხელისუფლების მიმართ ერთნაირად მწვავე იყო. რა იყო ვარჰეის ამ ლოიალობის მიზეზი?
– ევროპული დიპლომატია უფრო ფრთხილი და მოზომილია და ერთი მიზეზი ეგ იყო. მეორე ის იყო, რომ ოლივერ ვარჰეი ახლად არჩეული კომისარია, პირველი ვიზიტი ჰქონდა საქართველოში და მოერიდა მკვეთრი განცხადებების გაკეთებას, ხელისუფლების მწვავე კრიტიკას. ევროკავშირს საქართველოს ავტოკრატიული რეჟიმის მიმართ პოზიცია არ შეუცვლია. ისევ ითხოვენ დემოკრატიული რეფორმების გატარებას, ბიძინა ივანიშვილისა და სხვა ოლიგარქების დასანქცირებას, ზოგადად, იმ 12 პუნქტის შესრულებას, რაც ევროკომისიამ ჩაგვიწერა თავის რეზოლუციაში. მალე ვარჰეიც იმ ტექსტითა და რიტორიკით დაელაპარაკება „ქართულ ოცნებას“, როგორითაც ევროკავშირის სხვა ლიდერები ელაპარაკებიან. მე შენ გეტყვი, ესენი მიზეზს არ მისცემენ?!
კომენტარები