თამო კეშელავა
„ალიას“ ესაუბრება სამოქალაქო აქტივისტი, გია კორკოტაშვილი.
– ოქტომბერში სოციალურ ქსელში დაწერეთ: „გაიღვიძეთ და ლარად ნაჩუქარი ქონება გავახიოთ ამ ნაბოზრებს, უმეტესი ღორმუცელა ხალხის ხარჯზეა გამდიდრებული!“, მანამდე, წერდით, „ყველაზე ნაბოზარი ხალხი ის კატეგორია ხართ ვინც საკუთარი კეთილდღეობა არჩიეთ და ოცნების ლიდერების ფალოსის ტლიკვა დაიწყეთ როგორც თავის დროზე ნაცებისას ლოღნიდით!.. უნდა დაამხო ეს გველის ნაშობი ღორები და ქვეყანა ააშენოს განათლებულმა პატრიოტმა ახალგაზრდობამ ხანსიშესულ გამოცდილებასთან ერთად! მოლაპარაკებით არაფერი გამოვა უნდა გლიჯო საგლეჯს! სამაგისო დროც დადგება სექტემბრის ბოლო და ოქტომბრის შუა რიცხვები ზუსტად დაგვანახებს ამის აუცილებლობას!“ – გავიდა სექტემბერი და ოქტომბერი და რა დაგვანახა ამ პერიოდმა? “საგლეჯს უნდა ვგლიჯოთ“, თუ?
– ქართველი კაცი მომთმენია ბუნებით. ჯერ შემოდგომის დოვლათი მოჰყავს, თუ შეიძლება ამას დოვლათი დავარქვათ. მაინც ფუსფუსებენ. ნახევარმა კახეთმა დამირეკა, ვაზი უნდა ავჩეხოო, რატომ–თქო, გავგიჟდი, რატომ და ვშრომობთ, ვწვალობთ და ისევ იგივე ფასად იბარებენ ყურძენსო და არაფერი რჩებათ ხელთ წვალების და შრომის გარდა. საქართველოში რომ ვაზის აჭრამდე მიიყვან ხალხს, მომგებიანი საქმე არ არისო… ღმერთი რომ ასეთ ადგილს მოგცემს და ვერ გამოიყენებ… მაგრამ მაინც, ავად თუ კარგად, ჭირნახულს აბინავებს ჯერ ხალხი. ჩემი აზრით, ყველაზე დიდი გაჭირვების პერიოდი დეკემბერ–იანვარში უნდა იყოს. ზოგს ამოყორილი აქვს მუცელი და ზოგი მშიერი დარჩება. აქეთ მიშა დაჭერილია და საზოგადოების ნახევარი იძახის, ცუდადაა, გამოვუშვათო, ეტყობა ეს ის ადამიანები არიან, ვისი მეგობარიც არ უწამებით და არ მოუკლავთ წინა ხელისუფლების დროს, მაგრამ მეორე მხრივ, მიშას რომ კოსტუმების საქმეზე დაიჭერ… ჩვენც კაი ხვითოები გამოვდექით, პატიმრობაში მყოფს, ცოლს რომ გაგიუპატიურებენ, რაღად გინდა სიცოცხლე, რა არის შენი ღირსება? გული არ გისკდება? ინფარქტით სიკვდილს არ გირჩევნია გამოხვიდე და სამართალი შენით აღასრულო? არ ვგულისმხობ ძალადობას, ყველამ იმოქმედოს ისე, როგორც მისი ღირსება უკარნახებს.
– დეკემბერ–იანვარიო და ამასობაში ახალი წელიც დადგება, რომელიც ყველაფრის მიუხედავად, ყველაზე მკვდარი პოლიტიური სეზონია…
–მერე? რომ გადახედავენ ახალი წლის სუფრას და მისი მოყვანილი თხილი და ნიგოზი ექნება, შეიძლება ცოტა გოზინაყიც, პური და ხილი – არ უნდა დაფიქრდეს? ცოტა ხელის შეწყობა არ უნდა ადამიანს მთავრობისგან? ბევრ რამეში შეიძლება არ ტყუის ეს ხელისუფლება, მაგრამ ვიგინდარებმა ჩაიგდეს ხელში ფული და დოვლათი.
–აი, თქვენ ხომ მიიტანეთ პროექტი „აწარმოე საქართველოში“?
–კი.
–ხომ არ დაგიფინანსეს?
–არა.
–როგორც ამბობთ, თავად წყვეტენ, ვინ დააფინანსონ და ვინ არა და თუ მართლა ჩაუგდეს ფული ვიგინდარებს ხელში, თავად არ აირჩიეს ეს ვიგინდარებიც?
–ან უვიცია ხელისუფლება, ან ისეთი გაიძვერაა, სათავისოდ იყენებს ყველაფერს. რა განსხვავებაა ნაციონალურ მოძრაობას და ქართულ ოცნებას შორის? – ამ კითხვას ვუპასუხებ ახლა, არ ართმევენ ძალით და გართმევენ სხვა გზებით!
– რა არის გამოსავალი?
– უნდა გაიღვიძოს ქართველმა ხალხმა და უნდა ირწმუნოს საკუთარი თავის, რომ სწორედ მისი გადასაწყვეტია საკუთარი ქვეყნის ბედი.
– ეგ ზოგადი ფორმულაა და უფრო კონკრეტულად?
– ჩვენ გვქონდა ასეთი იდეაც, რომ არჩევნებზე ხალხმა თავად აარჩიოს თავისი წარმომადგენელი, მაგალითად, ჩოხატაურში, ბუკისციხეში, ჩემ დედულეთში, რომ შეიკრიბოს სოფელი და აირჩიოს ადამიანი, ვისაც ანდობს თავის სიტყვას, ვინც იცის თავისი სოფლის პრობლემა. მერე შეიკრიბოს ყველა სოფლის წარმომადგენელი რაიონში და იქაც თავად აირჩიონ ადამიანი, ვინც რაიონის სიტყვას მიიტანს მთვარობამდე. როცა რაღაც დაფინანსება იქნება გამოყოფილი, სოფელმა იცოდეს, რომ მისი არჩეული წარმომადგენელი ანაწილებს და ობიექტურად ანაწილებს და მართლა იმას ეხმარება, „ნასკი“ რომ აქვს გამოხეული და ლუკმა პური რომ არ აქვს, რომ მრავალშვილიანი ოჯახები, ვეტერანები, პენსიონრები, მომავალი თაობა მოვლილია და მიხედილი პირველ რიგში. ახლა რა ხდება? ახლა ირჩევენ წარმომადგენლებს პარტიული ნიშნით და ყველა აგინებს ხელისუფლებას, ხელისუფლებას კი პოლიცია გამოჰყავს… მივმართავ ქართველ კაცს, სახლში ჯდომას და იმაზე ფიქრს, როგორ გამოვკვებოთ ცოლ–შვილი, უმოქმედობისგან, ღირსების შელახვისგან, სახლში გულის გახეთქვას და ინფარქტით სიკვდილს, სჯობს, გარეთ გამოდი და თქვი ის სათქმელი, რაც გაქვს! აღარაფერი გვაქვს უკვე დასაკარგი. ვინც თვლის, რომ ჯერ კიდევ აქვს დასაკარგი რამე, ჩაბეტონდეს სახლში… მე ჩვენი წინაპრებიდან, ჩვენი მეფეების ქცევებიდან გამომდინარე ვიცი, რომ ქართველი კაცი ყოველთვის იბრძოდა ღირსებისთვის, თავისუფლებისთვის, ახლაც იგივეს მოლოდინი მაქვს.
კომენტარები