პოლონეთის პრემიერ-მინისტრმა მატეუშ მორავეცკიმ, უკრაინის საზღვართან მომხდარი ინციდენტის გამო მთავრობის საგანგებო სხდომა გამართა და თქვა, რომ ვარშავამ საგანგებო რეჟიმზე გადავიდა.
პოლონეთის პრემიერის თქმით, ქვეყნის ყველა სამსახური მობილიზებულია.
„ჩვენი ყველა უწყება მზადყოფნაშია – პოლიციელები, მესაზღვრეები, სახელმწიფო სახანძრო სამსახურის თანამშრომლები, ასევე სპეცსამსახურები. ვმუშაობთ საერთაშორისო ექსპერტებთან, რომლებიც მუშაობენ ჩვენს სპეციალისტებთან. ჩვენ მივმართეთ ჩვენს მოკავშირეებს მხარდაჭერისთვის. ჩვენ ვაანალიზებთ და ვატარებთ კონსულტაციებს ნატოს ხელშეკრულების მე-4 მუხლის გამოყენებასთან დაკავშირებით“, – განაცხადა მორავეცკიმ.
მან პოლონეთის მოქალაქეებს მოუწოდა, სიმშვიდე შეინარჩუნონ მომხდარ ტრაგედიასთან დაკავშირებით და მანიპულაციებს არ აჰყვნენ.
„ეს არის იარაღი, რომელსაც მოსკოვი იყენებს მრავალი წლის განმავლობაში და განსაკუთრებით ბოლო წლებში. მოვისმინოთ მთავრობისა და ჩვენი მოკავშირეების გზავნილები. ჩვენ ერთად უნდა ვიყოთ. ჩვენ ერთად ვიქნებით უსაფრთხოდ და ვერავინ შეგვაშინებს“, – დასძინა პოლონეთის პრემიერმა.
რუსეთმა მასიური სარაკეტო შეტევა განახორციელა უკრაინის ტერიტორიაზე, ერთ-ერთი რაკეტა პოლონეთის საზღვართან ჩამოვარდა და ორი ადამიანი ემსხვერპლა.
კომენტარები