საქართველოს მესამე პრეზიდენტის ადვოკატის, შალვა ხაჭაპურიძის განცხადებით, მას მოლოდინი აქვს, რომ სამხარაულის ექსპერტიზის ბიუროს ალტერნატიული ექსპერტიზა იტყვის, რომ სააკაშვილს ადაპტაციური აშლილობა და სტრესი აქვს.
როგორც მან მიხეილ სააკაშვილის მონახულებამდე ჟურნალისტებს განუცხადა, თუ სამხარაულის ექსპერტიზის ბიურო მსგავს დასკვნას წარადგენს, მათ “სერიოზული გამოცდა ელოდებათ სასამართლო პროცესზე”.
“დარწმუნებული ვარ, რასაც “ვივამედის” ექიმები აცხადებენ იმას გაიმეორებს სამხარაულის ექსპერტიზის ბიურო. იტყვიან, რომ ადაპტაციური აშლილობა და სტრესი აქვს. მათ პოზიციას საკმაოდ სერიოზული გამოცდა ელოდება სასამართლო პროცესზე, მინდა თავშივე გავაფრთხილო”,- აღნიშნავს ხაჭაპურიძე.
მან სააკაშვილის ჯანმრთელობის მდგომარეობაზეც ისაუბრა და აღნიშნა, რომ მარცხენა ხელი ატროფირებული აქვს.
“რამდენიმე თვის წინ დაეწყო ტკივილები. მარცხენა ხელი ატროფირებული, პრობლემები აქვს და გაუსაძლისი ტკივილები. გამაყუჩებლებს აძლდევდნენ, ახლა კი დაიწყო კვლევა. დაველოდოთ შედეგებს”,- აღნიშნავს ხაჭაპურიძე.
რაც შეეხება უშუალოდ კლინიკა “ვივამედს”, სადაც სააკაშვილს მკურნალობენ, როგორც ადვოკატი განმარტავს, კლინიკით უკმაყოფილოა და “ვივამედის” წინააღმდეგ მტკიცებულებებს სასამართლოზე წარადგენს. შალვა ხაჭაპურიძე ჯერჯერობით არ საუბრობს კლინიკის დარღვევებზე.
გარდა ამისა, კითხვაზე, არის თუ არა შესაძლებელი, რომ “ვარდების რევოლუციის” წლისთავზე დააყენონ სასამართლოში შუამდგომლობა სასჯელის გადავადებასთან დაკავშირებით, ხაჭაპურიძე განმარტავს, რომ თუ მოესწრება ტექნიკურად, შუამდგომლობას დააყენებენ.
კომენტარები