“კლასიფიკაცია უნდა ხდებოდეს იმ რუსულ კომპანიებს შორის, რომლებიც საქართველოში ბიზნესს არეგისტრირებენ. ვინც გულწრფელად, ბიზნესის საკეთებლად მოდის, ძალიან მკაფიოდ, მწვანე შუქი უნდა იყოს ანთებული“. – ამის შესახებ „ლელოს“ თავმჯდომარე მამუკა ხაზარაძემ უსაფრთხოების საკითხებში ექსპერტებთან შეხვედრამდე ჟურნალისტებს განუცხადა.
“მშვიდობიან პერიოდში ქვეყნის ბაზარი გახსნილი უნდა იყოს ყველა მიმართულებით კაპიტალის შემოდინების თვალსაზრისით, მაგრამ როდესაც საომარი ვითარებაა, რუსული კომპანიების რეგისტრაცია მიმდინარეობს და არ არის არანაირი ხედვა ამაზე, ეს დაუშვებელია. როდესაც რუსული კომპანიები აქ რეგისტრირდებიან, მათი წინა საქმიანობა უნდა იყოს შესწავლილი, უნდა წარმოადგინონ აუდიტორული დასკვნები, უამრავი სხვა პროცედურა გაიარონ, რათა ეს კომპანიები სხვადასხვა მიზნისთვის არ გამოიყენონ. ხოლო მათთვის, ვინც გულწრფელად, ბიზნესის საკეთებლად მოდის, ძალიან მკაფიოდ მწვანე შუქი უნდა იყოს ანთებული. მაგრამ არ ხდება კლასიფიკაცია, ვინ რისთვის შემოდის,” – განაცხადა მამუკა ხაზარაძემ.
მისივე თქმით, როდესაც ხელისუფლება შესაძლო რისკებისთვის არ ემზადება, ეს ძალიან სახიფათოა.
“როდესაც ხელისუფლება არ ემზადება შესაძლო რისკებისთვის, ეს ძალიან სახიფათოა, ამიტომ ჩვენი პოზიციაა, რომ ხელისუფლებას უნდა ჰქონდეს მკაფიოდ ჩამოყალიბებული ანტიკრიზისული პროგრამა, თუ ასეთი საჭიროება დადგა. ეს ეხება ყველაფერს – ქვეყნის ეროვნულ უსაფრთხოებას, ჩვენი მიმართულებით შესაძლო შემოტევას, ეკონომიკურ მდგომარეობას, ლარის სტაბილურობას და უამრავ სხვა საკითხს. სამწუხაროა, რომ ხელისუფლებაში მსგავსი მსჯელობები არ მიდის და საზოგადოებამ ამის შესახებ არ იცის. ეს ძალიან ცუდია,” – განაცხადა მამუკა ხაზარაძემ.
რაც შეეხება თავად შეხვედრას, საპარლამენტო პოლიტიკური ჯგუფის – „ლელო – პარტნიორობა საქართველოსთვის“ წევრებსა და უსაფრთხოების ექსპერტებს შორის დისკუსიაზე, მამუკა ხაზარაძის განცხადებით, რეგიონში არსებულ ვითარებასა და უსაფრთხოების საკითხებზე იმსჯელებენ.
„ჩვენმა პარტიამ კონფლიქტის დაწყებისთანავე მოუწოდა ხელისუფლებას, რომ უსაფრთხოების საბჭო მოიწვიონ, შემოიღონ დროებითი სავიზო რეჟიმი, შემოიღონ რეგულაციები ეროვნული ბანკის მხრიდან კომერციული ბანკებისთვის, როგორ უნდა იმოქმედონ ამ მდგომარეობაში. ასევე, დაიდოს ანტიკრიზისული ეკონომიკური პროგრამა. ამ საკითხებზე ვიმსჯელებთ სპეციალისტებთან“,- განაცხადა მამუკა ხაზარაძემ.
კომენტარები