უკრაინაში ვიზიტით მყოფმა გერმანიის კანცლერმა, ოლაფ შოლცმა განაცხადა, რომ უკრაინის ნატოში გაწევრიანების საკითხი ახლა დღის წესრიგში არ დგას.
„ახლა ძალიან სერიოზული გამოწვევა უნდა გადავლახოთ. ეს უკრაინის საზღვართან საფრთხის შემცველი ვითარებაა“, – აღნიშნა გერმანიის კანცლერმა.
ოლაფ შოლცმა ხაზი გაუსვა სიტუაციის დეესკალაციისა და ბელარუსიდან და უკრაინის საზღვრიდან რუსული ძალების გაყვანის უზრუნველყოფის მნიშვნელობას.
„ეს ის ამოცანაა, რომელიც ამჟამად გვაქვს. რაც შეეხება უკრაინის ნატოში წევრობას, ამ ეტაპზე ეს საკითხი აქტუალური არ არის. ამიტომაც ცოტა უცნაურია, რომ რუსეთის მთავრობამ ეს საკითხი დიდი პოლიტიკური დისკუსიების საგნად აქცია“, – განაცხადა გერმანიის კანცლერმა.
ოლაფ შოლცმა ხაზგასმით აღნიშნა, რომ ალიანსების თავისუფლად არჩევის პრინციპი განხილვის საგანი ვერ იქნება.
კომენტარები