„ივანიშვილს და ღარიბაშვილს რომ უთხრა, ციხეში მოგიწევთ ჯდომაო, სასაცილოდ არ ეყოფათ… ესე იცინოდა სააკაშვილიც…“ – ზაზა ხატიაშვილი

ლევან ჯავახიშვილი, „ალია“

„ალიას“ ესაუბრება ადვოკატი ზაზა ხატიაშვილი.

– ისე, რაც ამ პროკურატურამ და სასამართლომ დამართა სააკაშვილს, სხვას არ უნდა დააბრალოს. პროკურატურისა და სასამართლოს ეს მახინჯი სისტემაც მისი შექმნილია, მისი დანიშნულები და დაწინაურებულები არიან პროკურორები და მოსამართლეები, რომელთაც ბრალი დასდეს, გაასამართლეს და დღესაც ასამართლებენ. იმას არ ვამბობ, რომ სააკაშვილი უდანაშაულოა. არა, დამნაშავედ მიმაჩნია და სასჯელიც უნდა მოიხადოს, მაგრამ ღირსეულად. მას კი ღირსეულად გასამართლების უფლება წაართვეს და ეს მისი ბრალიც არის. მან შექმნა ეს სისტემა და ივანიშვილმა შეინარჩუნა. გახსოვს, სააკაშვილის რეჟიმის დროს, მინიმუმ, ხუთჯერ მაინც მაქვს „ალიასთან“ ნათქვამი ინტერვიუებში, რომ სააკაშვილის და მისი რეჟიმის სხვა მაღალჩინოსანთა დანაშაულებრივ საქმეებს, მისივე პროკურორები გამოიძიებდნენ და მისივე მოსამართლეები დასჯიდნენ?! ასეც მოხდა. ბაჩო ახალაია, ვანო მერაბიშვილი, გიგი უგულავა და სხვები, იმ პროკურორებმა და მოსამართლეებმა დასაჯეს, ვინც მათი ზეობის დროს, უდანაშაულო ადამიანებს აუბედურებდა. ახლა ბიძინა ივანიშვილს ვეუბნები – ეს „მურუსიძეების“ სასამართლო გაასამართლებს მასაც, ღარიბაშვილსაც და ამ ხელისუფლების ბევრ წარმომადგენელს, ვისაც დანაშაულებები აქვთ ჩადენილი. 

…პოლიტიკური ნიშნები სააკაშვილის გასამართლების საქმეში აშკარაა. სხვას თავი დავანებოთ, ირაკლი ღარიბაშვილისა და „ქართული ოცნების“ სხვა ლიდერების განცხადებები გაიხსენე. ბიძინა ივანიშვილს რადგან ბევრი ფული აქვს, ჰგონია, რომ მას ვერასდროს ვერავინ შეეხება. ასე არ არის. ვანო მერაბიშვილისთვის რომ გვეთქვა, როდესაც ხელისუფლებაში იყო, 8 წელი ციხეში ჩაჯდებიო, ხომ ჩაგვცხებდა თავში „დუბინკას“? ახლა ივანიშვილს და ღარიბაშვილს რომ უთხრა, ციხეში მოგიწევთ ჯდომაო, სასაცილოდ არ ეყოფათ. ეგრე იცინოდნენ მერაბიშვილი, სააკაშვილი, ბაჩო ახალაია… ესენიც, „ნაციონალებივით“ ფიქრობენ, რომ მუდამ ხელისუფლებაში იქნებიან. სააკაშვილის საქმეზე სტასბურგის გადაწყვეტილება საბრალდებო დასკვნა იქნება ბიძინა ივანიშვილისა და მისი ხელისუფლებისთვის. სააკაშვილისთვის და მისი რეჟიმისთვის სანდრო გირგვლიანის საქმე იქცა საბრალდებო დასკვნად და ბიძინა ივანიშვილის რეჟიმისთვის სააკაშვილის საქმე გახდება. მე მინდა, ერთი ფაქტი გაგახსენო. ივანიშვილზე გავლენიანი ოლიგარქია მილიარდელი რომან აბრამოვიჩი. ამ კაცმა ინგლისის საფეხბურთო კლუბი „ჩელსი“ იყიდა. მილიარდზე მეტი ჩადო კლუბში. „ჩელსის“ მოაგებინა ორჯერ ჩემპიონთა ლიგა, ხუთჯერ ინგლისის ჩემპიონობა და ჯამში, 15 ტიტული. აბრამოვიჩს „ჩელსის“ ფანები აღმერთებენ. თან, „ჩელსი“ ლონდონის გუნდია და ითვლება ლონდონის არისტოკრატთა გუნდად. „ჩელსის“ „არისტოკრატებსაც“ ეძახიან მეტსახელად. მთელი ლონდონის არისტოკრატია მოიმადლიერა აბრამოვიჩმა და მათ წრეში საპატიო ადგილი დაიკავა. ის ბრიტანეთის სამეფო ოჯახთან ერთად სადილობდა და ეს ცნობილი ფაქტია. ინგლისში ფეხბურთი რელიგიასავით არის და მოკლედ, აბრამოვიჩს ხელის გულზე ატარებენ ამ ქვეყანაში. დასავლეთმა სანქციების დაწესება რომ გადაწყვიტა რუსი ოლიგარქებისთვის და აბრამოვიჩიც მოხვდა ამ სიაში, მაშინ “ჩელსის“ ინგლისის თასის ფინალი ჰქონდა სათამაშო და აბრამოვიჩი იმ დროს ევროპაში იმყოფებოდა. ინგლისის ხელისუფლებამ აბრამოვიჩი არ შეუშვა ქვეყანაში, რომ საკუთარი გუნდის თამაშს დასწრებოდა. კაცი, რომელიც ყველაზე მიღებული უცხოელი იყო ლონდონში, ინგლისში ვერ შედიოდა კარგა ხანს. აბრამოვიჩი ებრაელია, მიიღო ისრაელის მოქალაქეობა და რაღაცნაირად გადაურჩა სანქციებს. ივანიშვილი არ არის აბრამოვიჩის დონის ოლიგარქი. არც აბრამოვიჩის დონის ახლობლები ჰყავს ევროპულ თუ ამერიკულ პოლიტიკურ წრეებში. მას დიდი პოლიტიკური თამაშები მხოლოდ რუსეთში უთამაშია და ეს არაფერს ნიშნავს დასავლეთისთვის. პირიქით, უცხოელი პოლიტიკოსების თვალში ეს მინუსია. ეს უნდა იყოს მესიჯი ივანიშვილისთვის. ზუსტად ვერ გეტყვი, როდის იქნება, მაგრამ ივანიშვილს და მის ახლო გარემოცვას, დასავლეთი სანქციებს დაუწესებს. ამხელა სისულელეებს არ აკეთებდა ივანიშვილი, როდესაც პარლამენტის თავმჯდომარე დავით უსუფაშვილი იყო. უსუფაშვილი ჯიუტი და ღირსეული კაცია და როგორ გულითაც არ უნდა სდომებოდა ივანიშვილს, არ მიიღებდა ისეთ გადაწყვეტილებას, რომ მერე სამასხარაოდ გაეხადა საქმე. ირაკლი ალასანიაც აკლია ივანიშვილს, ისიც დიდ წინააღმდეგობას უწევდა და  სერიოზული პოლიტიკური ძალა იყო მის გუნდში. ახლა ვინ დარჩა გვერდით? ირაკლი ღარიბაშვილი, რომელიც მის ყველა უგუნურ ბრძანებას უსიტყვოდ ასრულებს, ზედ კიდევ თავის უგუნურებას უმატებს. ირაკლი კობახიძე კი სრული გაუგებრობაა, რომელიც დილით ერთს იძახის, საღამოს მეორეს და მისი ყველა განცხადება ხალხის გახლეჩვას, ურთიერთდაპირისპირებას უწყობს ხელს. ამ ხალხმა, კიდევ სხვებმა გადაჰკიდეს დასავლეთი ივანიშვილს. ყველა გაყარა, ვინც ნამდვილი პოლიტიკოსი იყო. ახლა ღარიბაშვილი, კობახიძე და სხვა გაუწონასწორებელი ადამიანების ხელით მართავს ქვეყანას. ამას უყურებს მთელი მსოფლიო და არა მგონია, ეს დიდხანს გაგრძელდეს. დასავლეთი მიიღებს შესაბამის ზომებს, რომ ამათი თავგასულობა აღკვეთოს. როდის? ამას დრო დასჭირდება და სანქციებსაც დაადებენ და სხვა ღონისძიებებსაც გაატარებენ. იქნება დაგვიანებული, მაგრამ ძალიან მკაცრი რეაქციები. ბოლოს და ბოლოს, მთელი ჩვენი საბანკო სისტემა მიბმულია ამერიკისა და ევროპის საბანკო სისტემაზე, ადგებიან და ლარს ქაღალდად აქცევენ, გააუფასურებენ ერთი დოლარი 10 ლარი ეღირება. ჩამოშლიან მთელ ეკონომიკას. ამას რა მოჰყვება? ეკონომიკის სრული კოლაფსი და რა რეაქცია ექნება ამაზე ხალხს? აუჯანყებენ ხალხს ხელისუფლებას, თუ მოინდომეს. რა, ჯერ არ უქნია ეს დასავლეთს სხვა და სხვა ქვეყნებში და აქაც იგივე არ გაუკეთებიათ? ეს არ ესმის არც ბიძინა ივანიშვილს, არც მის გარემოცვას. ვერ ხედავენ ამ და სხვა საფრთხეებს.