ჯანდაცვის მსოფლიო ორგანიზაცია და აშშ-ის დაავადებათა კონტროლისა და პრევენციის ცენტრი (CDC) აცხადებენ, რომ იმის გამო, რომ 2020 წელს პანდემიის დროს 22 მილიონზე მეტმა ჩვილმა წითელას საწინააღმდეგო ვაქცინის პირველი დოზები ვერ მიიღო, მსოფლიოში წითელას აფეთქების რისკი მაღალია.
ჯანდაცვის მსოფლიო ორგანიზაციისა და აშშ-ის დაავადებათა კონტროლისა და პრევენციის ცენტრის ერთობლივ ანგარიშში აღნიშნულია, რომ 2019 წელთან შედარებით, გასულ წელს წითელას დარეგისტრირებული შემთხვევები 80%-ზე მეტით შემცირდა, თუმცა ბავშვების დიდი რაოდენობა, რომლებმაც ვაქცინის დოზები ვერ მიიღეს, დაუცველი რჩება.
2019 წელთან შედარებით, 2020 წელს 3 მილიონზე მეტმა ბავშვა წითელას საწინააღმდეგო ვაქცინა ვერ მიიღო, რაც საფრთხეს უქმნის გლობალურ ძალისხმევას, რათა საბოლოოდ აღმოიფხვრას აღნიშნული უაღრესად ინფექციური ვირუსული დაავადება.
„არავაქცინირებული ბავშვების დიდი რაოდენობა, წითელას აფეთქება და დაავადების გამოვლენა და დიაგნოსტიკა, რომელიც COVID-19-ზე რეაგირების მხარდასაჭერად არის მიმართული, ის ფაქტორებია, რომელიც ბავშვებში წითელასთან დაკავშირებული სიკვდილიანობისა და სერიოზული გართულებების ალბათობას ზრდის”, – განაცხადა CDC-ის იმუნიზაციის ხელმძღვანელმა, კევინ კეინმა.
წითელა ერთ-ერთი ყველაზე გადამდები დაავადებაა. იგი უფრო მეტად გადამდებია, ვიდრე COVID-19, ებოლა, ტუბერკულოზი ან გრიპი. ის განსაკუთრებით საშიში შეიძლება იყოს ჩვილებისა და მცირეწლოვანი ბავშვებისთვის. შესაძლო გართულებებს შორის პნევმონია ფიქსირდება.
ბოლო მოხსენების თანახმად, 23 ქვეყანაში 2020 წლისთვის დაგეგმილი წითელას ვაქცინაციის 24 კამპანია გადაიდო, რის გამოც 93 მილიონზე მეტი ადამიანი რისკის ქვეშ აღმოჩნდა.
„მნიშვნელოვანია, რომ ქვეყნებმა რაც შეიძლება სწრაფად ჩაატარონ ვაქცინაცია COVID-19-ის წინააღმდეგ, მაგრამ ეს ახალ რესურსებს მოითხოვს, რათა ის იმუნიზაციის ძირითადი პროგრამების ხარჯზე არ მოხდეს. რუტინული იმუნიზაცია დაცული და გაძლიერებული უნდა იყოს. წინააღმდეგ შემთხვევაში, ერთ სასიკვდილო დაავადებას მეორეთი ჩავანაცვლებთ”, – განაცხადა ჯანმოს იმუნიზაციის დეპარტამენტის დირექტორმა, კეიტ ობრაიენმა.
კომენტარები