“ლეიბორისტული” პარტიის ლიდერი შალვა ნათელაშვილი აცხადებს, რომ საქართველოში პოლიტიკური რეპრესიები დაიწყო და ოპოზიციის აქციებზე დაკავებული ადამიანები პოლიტპატიმრები არიან.
“მასობრივი რეპრესიები უკვე ქუჩაში მძვინვარებს. პოლიცია და უშიშროება აღარ ეკუთვნის საქართველოს. ისინი ოლიგარქის ნაყიდი ჯალათებია. თავისუფლება ყველა უკანონოდ დაკავებულ პოლიტ–მსხვერპლს. ეს არ შეგრჩებათ. – წერს სოციალურ ქსელში შალვა ნათელაშვილი.
შეგახსენებთ, რომ ოპოზიცის დღევანდელ აქციებზე ჯამში ადმინისტრაციული წესით 46 პირი დააკავეს. უწყება აცხადებს, რომ აქციის მონაწილეები “გასცდნენ შეკრების და გამოხატვის თავისუფლების კანონით დასაშვებ ფარგლებს და შეეცადნენ ადმინისტრაციული შენობების შესასვლელების ბლოკირებას”.
“შინაგან საქმეთა სამინისტრო იცავს ჩვენი მოქალაქეების საქართველოს კონსტიტუციით გარანტირებულ მშვიდობიანი შეკრებებისა და მანიფესტაციის გამართვის უფლებას. ამასთან, აღსანიშნავია, რომ „შეკრებებისა და მანიფესტაციების შესახებ“ საქართველოს კანონის შესაბამისად, აკრძალულია ადმინისტრაციული ორგანოების შენობების შესასვლელების ბლოკირება და მათი საქმიანობის შეფერხება.
როგორც წინა დღეებში, ასევე დღესაც შინაგან საქმეთა სამინისტროს თანამშრომლები უსაფრთხოების ზომებიდან გამომდინარე და მოვლენების ხელოვნურად ესკალაციის თავიდან არიდების მიზნით, მობილიზებული არიან და საზოგადოებრივ წესრიგს იცავენ”, – წერია უწყების განცხადებაში.
კომენტარები