“როგორც ექიმი, სააკაშვილს მოვუწოდებდი, რომ შიმშილობა შეწყვიტოს და საფრთხეს ნუ უქმნის საკუთარ ჯანმრთელობას,” – ამის შესახებ ჟურნალისტებთან პარლამენტის ვიცე- სპიკერმა დავით სერგეენკომ განაცხადა.
კითხვაზე, რამდენად შეიძლება მისი ჯანმრთელობის მდგომარეობის გაუარესება გახდეს მისი გათავისუფლების საფუძველი, სერგეენკო აცხადებს, რომ ყველა ადამიანის ჯანმრთელობა თანაბრად მნიშვნელოვანია.”აქ მე ვერ განვასხვავებ ადამიანურად და პროფესიულად ყოფილი პრეზიდენტია, თუ ვინმე სხვა პატიმარი. ყველას ჯანმრთელობა თანაბრად მნიშვნელოვანია. ნამდვილად მჯერა, რომ ექიმები, ვინც ჩართულები არიან მისი მდგომარეობის მონიტორინგში ყველაფერს გააკეთებენ, რომ გართულებები არ იყოს“, – განაცხადა სერგეენკომ.
ცნობისთვის, მიხეილ სააკაშვილის პირადმა ექიმმა, ნიკოლოზ ყიფშიძემ გუშინ სააკაშვილის საპატიმროში მონახულების შემდეგ განაცხადა, რომ სააკაშვილი მორალურად თავს კარგად გრძნობს, მაგრამ უჭირს სიარული, აქვს სისუსტე და სახეზე უფერულობა.
“ჩემი რჩევა და რეკომენდაციაა, რომ ეს კონსილიუმი შედგეს უფრო ადრე, ვიდრე სამშაბათს, ექიმებმა უნდა თქვან რა გავაკეთოთ შემდეგ. საჭიროა თუ არა მისი ჰოსპიტალში გადაყვანა, რა მინერალები უნდა მივცეთ, ან რა უნდა გადავუსხათ,” – განცხადება ყიფშიძემ.
შეგახსენებთ, რომ უკვე შექმნილია ექიმების მულტიფუნქციური ჯგუფი, რომელიც საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობას შეისწავლის და დეტალურ ანალიზს გააკეთებს.
ექსპრეზიდენტი მიხეილ სააკაშვილი სამართალდამცველებმა პირველ ოქტომბერს დააკავეს. პროტესტის ნიშნად, მიხეილ სააკაშვილი შიმშილობს.
კომენტარები