ვის აქვს უკეთესი იმუნიტეტი – კოვიდგადატანილს თუ ვაქცინირებულს – ბიძინა კულუმბეგოვის განმარტება

აქვთ თუ არა  კოვიდგადატანილებს უფრო მაღალი იმუნიტეტი, ვიდრე აცრილებს – აღნიშნულ კითხვას  ალერგოლოგ-იმუნოლოგმა, ბიძინა კულუმბეგოვმა “დღის კურიერის” ეთერში უპასუხა. 

“მე ნახევრად ირონიითა და ნახევრად სიმართლით, ამაზე პასუხი გავეცი ჩემს სოციალურ ქსელში და ვთქვი, რომ კოვიდგადატანის შემდგომ, შესაძლოა, იყოს კარგი იმუნური დაცვა და ამაში უცხო არაფერია, მაგრამ თუ გადავურჩით ამ ინფექციას.

ამით იმის თქმა მინდა, რომ უშუალოდ კოვიდის პირისპირ დაცვის გარეშე ადამიანების დატოვება – ეს არის სწორედ ბარბაროსული გზა, სადაც სიკვდილობის მაჩვენებელი არის 10-11-ჯერ მეტი ვიდრე აცრილებში.

“კოვიდსაწინააღმდეგო ვაქცინით არ უნდა ავიცრათ და ყველა ვირუსის გადატანის იმედად უნდა ვიყოთ” – ეს არის სრული ნონსენსი და მსგავსი განცხადებების გაკეთება ბუნებრივია არავის არ შეშვენის, მითუმეტეს ექიმს, თუმცა კიდევ ერთხელ, შინაარსობრივად ჩვენ თუ ჩავწვდებით, ეს ობიექტური რეალობა ასეთია, მაგრამ კიდევ ერთხელ – აუცილებელია დაცვა ხელოვნური და ხელოვნურ დაცვას სწორედ ვაქცინაცია ჰქვია იმიტომ, რომ კოვიდი შეიძლება დაემართოს აცრილსაც, მაგრამ ეს ალბათობა გარდაცვალების ან მძიმე დაავადების განვითარების მკვეთრად შემცირებულია. არავინ არ ამბობს, რომ არ უნდა ავიცრათ და კოვიდი გადავიტანოთ – ეს სრული ნონსენსია,” – აცხადებს ბიძინა კულუმბეგოვი.

ბიძინა კულუმბეგოვი სავარაუდოდ პირველი საუნივერსიტეტო კლინიკის დირექტორის, ლევან რატიანის განცხადებას გულისხმობდა, რომელმაც რამდენიმე დღის წინ თქვა, რომ საუკეთესო იმუნიტეტი კოვიდგადატანილებს უყალიბდებათ.